iklan

COVID-19, HEADLINE, SAÚDE

CICG rekomenda Governu aplika hikas konfinamentu obrigatóriu iha kapitál Dili

CICG rekomenda Governu aplika hikas konfinamentu obrigatóriu iha kapitál Dili

Primeiru-Ministru, Taur Matan Ruak ho membru Governu relevante debate kona-ba pedidu estensaun Estadu Emerjénsia hosi Prezidente Repúblika, iha sala plenária Parlamentu Nasionál, tersa (24/08). Imajen TATOLI/Egas Cristóvão.

DILI, 24 agostu 2021 (TATOLI)-Sala Situasaun, Sentru Integradu Jestaun Krize  (CIGC, sigla portugés) rekomenda ba Governu atu aplika hikas konfinamentu domilisiáriu obrigatóriu iha kapitál Dili tanba númeru kazu pozitivu no óbitu sa’e maka’as iha semana ikus.

“Haree ba variante Delta ho transmisaun lais no óbitu rejistadu sa’e ba 50 iha semana ikus, tanba ne’e ami rekomenda implementa konfinamentu obrigatóriu no serka sanitária mais efetivu atubele hapara transmisaun no óbitu,” Koordenadór Pilar-7 hosi Ministériu Saúde, Nilton da Silva, ne’ebé integra mós iha ekipa CIGC, hateten, iha ámbitu diskusaun renovasaun Estadu Emerjénsia ba dala-XVII iha sala plenária Parlamentu Nasionál, tersa ne’e.

Notísia relevante: Governu hakotu konfinamentu domisiliáriu no autoriza hikas movimentu transporte públiku

Biban ne’e, CIGC enkoraja sidadaun ho idade 18 ba leten atu simu vasina ho doze kompleta atubele prevene infesaun COVID-19 no mortalidade ho moras ne’e.

Iha loron 23 agostu, númeru detetadu foun iha oras 24 nia laran hamutuk 187, rekuperadu foun 67, óbitu ida, ho kazu ativu 3.383, komulativu rekuperadu 10.971, kazu konfirmadu ne’ebé rejista hahú 20 marsu 2020 to’o agora hamutuk 14.403, óbitu rejistadu 50, ne’ebé maioria infetadu hosi Dili no munisípiu lima seluk ne’ebé tama ona nível transmisaun komunitária, ne’ebé hatudu orijen vírus labele buka tuir ona.

“Ohin,  ita-nia kazu óbitu hamutuk 50 ona no hosi ne’e ita haree katak la’ós ona iha Sentru Izolamentu Vera Cruz no Lahane, maibé iha mós Ermera no Rejiaun Administrativa Espesiál Oé-cusse Ambeno (RAEOA). Hosi númeru óbitu ne’e iha semana ikus ne’e hamutuk 19 ho maioria infetadu seidauk hetan vasina,” nia akresenta.

Númeru ospitalizasaun ka ema ne’ebé baixa iha sala internalmentu Vera Cruz no Lahane hamutuk pasiente 375, inklui semana kotuk rejista tan pasiente 54 ne’ebé ho nia maioria istória seidauk simu vasina COVID-19.

“Ita haree hosi pasiente 45 ne’e, balun rejistu hanesan óbitu ona no iha pasiente tolu mak ho kondisaun grave. Ami mós haree númeru mortalidade a’as iha semana kotuk,” nia hatutan.

Nune’e, Koordenadór ne’e refere ba variante Delta iha Timor-Leste, servisu pilár halo ona teste adisionál ba sekuénsia genome kompletu hodi haruka ba Institutu Doherty iha Austrália, hosi amostra Dili, Ermera no munisípiu sira seluk hamutuk 45.

“Hosi rezultadu teste amostra ne’e, variante Delta sirkula ona iha Dili tanba epidemolójika ka inkubasaun ne’e rápidu no agresivu daet ba ema seluk,” nia hatutan.

Tuir dadus kona-ba progresu imunizasaun COVID-19, to’o loron 24 agostu, totál vasina ne’ebé fó ona iha Timor-Leste tomak hamutuk 544.175, kompostu hosi doze dahuluk 370.300 (49,1%) no doze daruak 173.875 (23%).

Enkuantu, iha Dili, totál vasina ne’ebé fó ona hamutuk 272.399, kompostu hosi doze dahuluk 155.588 (72,8%) no doze daruak 116.811 (54,6%).

To’o loron 22 agostu, hatudu kobertura jerál iha Timor-Leste ba kampaña imunizasaun ema ne’ebé vasina kompletu ona hamutuk 21,7%, kompostu hosi iha Dili 53%, Covalima 10,9%, Viqueque 13,3%, RAEOA 6,1%, Baucau 13,7%, Bobonaro 8,1%, Manatuto 8,6%, Lautém 7,6%, Manufahi 9,1%, Liquiçá 8,1%, Aileu 8,3% , Ainaro 7,5% no Ermera 7,2%.

Jornalista : Florêncio Miranda Ximenes

Editora     : Julia Chatarina

iklan
iklan

Leave a Reply

iklan
error: Content is protected !!