DILI, 27 abríl 2023 (TATOLI) – Portavós no Koordenadór Polítika Esterna Partido Congresso Nacional de Reconstrucão de Timor-Leste (CNRT, sigla Portuges), Roberto Soares, hato’o apresiasaun ba militante no simpatizante, kuadru no forsa polítika hotu ne’ebé apoiu CNRT tanba lori ona kampaña CNRT nian iha ponta leste hetan rezultadu di’ak.
Portavós ne’e informa katak balansu kampaña partidu CNRT nian ne’ebé durante ne’e hala’o iha ponta leste hahú ba dahuluk iha munisípiu Manatutu no kontinua bá Vikeke, Baukau no taka iha Lautém hatudu rezultadu ida di’ak tebes, tanba militante, simpatizante, kuadru partidu no forsa polítika sira hotu ninia maturidade polítika.
“Partidu CNRT rejista no fó apresiasaun boot tebetebes ba partisipasaun hosi ema hotu nian hodi lori CNRT ninia kampaña iha ponta leste ne’e hetan rezultadu ida di’ak tebes”, Roberto Saores reiteira iha konferénsia imprensa ne’ebé hala’o iha Bairro dos Grilhos, kinta ne’e.
Prosesu kampaña ne’ebé la’o iha ponta leste ne’e demonstra buat ida espesiál tebes ba povu Timor-Leste, tanba partisipasaun másima militante no simpatizante nian inklui forsa polítika hotu ne’ebé mai fó apoiu iha kampaña ne’e.
“Iha kampaña CNRT nian iha munisípiu tolu ne’e rejista ho ksolok tanba partisipasaun militante no forsa polítika sira hotu fó apoiu másimu ba partidu CNRT no ba Komandante ein-Xefe Kay Rala Xanana Gusmão iha kampaña tinan ida ne’e”, katak.
Nune’e, CNRT hakarak felisita no agradese, inklui observasaun ba papél esensiál ne’ebé Komisaun Nasionál ba Eleisaun (CNE, sigla portugés) no Polísia Nasional Timor-Leste (PNTL) hala’o ona iha prosesu kampaña partidu nian ne’ebé hala’o iha ponta leste.
“Ami kontinua reiteira partidu CNRT ninia ksolok no dezeju ba CNE no PNTL ne’ebé hala’o ona sira-nia knaar ho profisionalizmu, dedikasaun no imparsialidade hodi asegura kampaña la’o ho di’ak tuir kalendáriu ne’ebé maka determinadu”, nian realsa.
Partidu CNRT sei kontinua ninia prosesu kampaña tuir kalendáriu katak iha 27 abríl halo mini kampaña iha Aileu-Lekidoe no Ainaro-Maubisse. Iha 28 sei hala’o komísiu iha Covalima no loron tuirmai iha Jumalai. Iha 30 abríl sei filafali mai Ainaro hodi hala’o komísiu.
Partidu CNRT husu ba nia militante no simpatizante atu kontinua apoia másima iha kampaña tuir kalendáriu ne’ebé mak estabelese ona hosi CNE no tane aas espíritu no valór demokratizasaun ne’ebé maka la’o iha nasaun ne’e.
Notísia relevante: CNRT sei prioritiza desentralizasaun – podér lokál iha munisípiu Lautém
Jornalista: Tomé Amado
Editora: Maria Auxiliadora
