ERMERA, 17 marsu 2024 (TATOLI) – Aluno hamutuk 400 resin iha Ensino Báziku Sentral Baboe Leten (EBC Baboe Leten), Postu Administrativu Atsabe, Munisípiu Ermera hasoru hela difikuldade boot tanba sira prosesu aprendizajen halao iha fatin risku nia laran.
Bazeia ba observasaun direta husi jornalista Tatoli iha terenu, kondisaun edifisiu rua (2) EBC Baboe Leten grave tebes no persiza intervensaun imediata.
Inspetór Eskolár Postu Administrativu Atsabe, Vitorino Fernandes haktuir katak “eskola ne’e grave tanba rai halai, maibé xefe suku ho komunidade sira tur hamutuk ona atu muda emerjénsia, maibé tanba komunidade sira laiha kbiit tanba ne’e to’o agora eskola ne’e seidauk muda no labarik sira sei kontinua tuir prosesu aprendizajen iha eskola ne’e.”
“Bainhira udan no anin boot mestre ho alunu sira sempre halai sai tanba rai halai halo eskola ne’e nia pozisaun halis no ai-riin mos kleuk hotu ona. Eskola ne’e iha sala neen (6) no kuaze sala hirak ne’e grave hotu,” Inspetor Eskolár Vitorino ba Tatoli, iha Merkadu Atsabe Vila.
Nia salienta katak alunu sira la tuir prosesu aprendizajen ho di’ak liu liu iha tempu udan no iha bailoron tanba anin boot halo eskola ne’e nakdoko hotu: “Eskola ne’e nia kondisaun aat besik ona tinan lima.”
Vitorino relata katak Xefe suku ho komunidade sira iha foti ona alternativa atu muda provizóriu eskola ne’e ba kapela no mós ba Eskola Bázika Filiál Baboe Kraik: Maibé se ita muda ba iha ne’ebá, alunu sira sei la ba tanba nia distánsia ne’e dook.”
“Ami hato’o ona proposta inklui dadus no dokumentasaun eskola nian ba servisu edukasaun munisípiu Ermera iha governu interior atu aprova pakote apoiu emerjénsia nian atu fasilita prosesu aprendizajen maibe seidauk iha resposta,” nia dehan.
Inspetór Eskolar ne’e hateten nia parte seidauk aprezenta fali proposta foun ba servisu edukasaun munisipál hodi aprova pakote apoiu emerjénsia tanba eskola ne’e konsidera grave.
Eskola Bázika Filiál Baboe Leten ne’e simu mós estudante balu husi suku Lauana, postu administrativu Letefoho.
Manorin na’in EBC Baboe Leten, Angelmos Gomes, husu ba ministériu edukasaun bele tau matan hela mai ami nia eskola ne’e tanba rai halai halo eskola ne’e halis los ona: “Iha tempu udan, ami tenke fo ferias ba alunu sira tanba kondisaun ladiak.”
“Ami mos hakarak husu ba Sekretáriu Estadu ba Protesaun Sivíl atu ajuda ami ho materiál emerjensia hodi hari fatin emerjensia ruma. Atu nune’e bainhira fatin ne’e grave ami bele uza hodi kontinua ami nia prosesu aprendizajen,” Angelmos apela.
Hodi responde ba situasaun difísil ne’e, Guilherme Mendonça nu’udar Xefe Seksaun Planeamentu Postu Administrative Atsabe informa katak Administrador Postu realiza ona reuniaun asembleia nível postu no aprezenta ona proposta ba Konsellu Koordenasaun Munisipál: “Autoridade lokál identifika ona rai atu halo konstrusaun foun ba EBC Baboe Leten maibé ami husu nafatin ba Ministériu Edukasaun atu prioridade ba eskola refere.”
Jornalista Tatoli koko konfirma asuntu refere liga proposta ne’ebé hato’o ona ba Edukasaun Munisípiu Ermera, maibé Diretor Edukasaun laiha fatin.
Jornalista: Afonso do Rosario
Editór: Filomeno Martins
