DILI, 06 janeiru 2021 (TATOLI)–Governu liuhosi reuniaun Konsellu Ministru (KM) nomea ona Paulo da Silva nu’udar Prezidente Konsellu Administrasaun (KA) Eletricidade de Timor-Leste, Empreza Públika (EDTL,E.P) ba mandatu tinan haat.
“Proposta ne’ebé mak aprezenta hosi Ministru Obra Públika, Salvador Eugênio Soares dos Reis Pires, aprovadu iha Konsellu Ministru,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM iha Palásiu Governu, kuarta ne’e.
Notísia Relevante: MOP nomea ona membru komisaun instaladora ba tranzisaun EDTL
Tuir Portavós Governu ne’e, Prezidente KA foun iha esperiénsia tinan barak tanba ne’e merese ezerse kargu refere.
“Konsellu Ministru laiha dúvida kona-ba ninia méritu nokoñesementu hodi bele kontribui dezenvolve setór enerjia iha setór elétrika iha futuru,” nia akresenta.
Antes ne’e, EDTL hanesan diresaun jerál ne’ebé tutela iha Ministériu Obra Públika (MOP), ne’ebé durante ne’e lidera hosi Arlinda Miranda Manetelo hanesan Diretora Jerál.
Maibé Governu atu kria medida estruturante ba setór eletrisidade liuhosi kriasaun estatutu instituisaun ne’e.
EDTL sei apoiu Governu ba definisaun polítika rekursu enerjétiku, halo planu eletrifikasaun nasionál, promove uza efisiente enerjia elétrika, asegura fornesimentu enerjia elétrika ba konsumu, kualidade konsumu, hadi’a sistema integradu automatizasaun no komunikasaun, medida ba kontrolu no inspesaun ba eliminasaun konesaun ilegál, inklui ezerse atividade importasaun no esportasaunenerjia elétrika.
Iha loron 20 jullu 2020, Prezidente Repúblika promulga dekretu-lei kona-ba kriasaun empreza públika (EDTL,E.P) no ninia estatutu.
Hafoin dekretu-lei vigora, MOP hahú estabelese komisaun instaladora hodi halo tranzisaun no preparativu ba transformasaun hosi diresaun ba empreza públika.
Jornalista: Antónia Gusmão
Editora: Julia Chatarina
