DÍLI (ANTIL) – Kandidatu Prezidente númeru 1 Prezidente Repúblika (PR) periodu 2017 – 2022, António Maher Lopes “Fatuk Mutin” dehan kandidata an ba PR hanesan xamada ida atu servisu no dedika-an ba estadu no povu atu halo buat ruma, ho konhesementu, kapasidade, intelektual, no idade produtiva ne’ebé mak iha. Tamba ne’e iha nia kandidatura nia promete sei prepara jerasaun foun ho diak ba futuru Timor-Leste.
“Hau atu hatudu ba públiku katak iha Timoroan ida, jerasaun foun ida, prontu ona hakarak serve no dedika ba estadu,” Fatuk Mutin ba ANTIL iha nia sede, Vila-Verde, Kinta (02/03/2017).
Alumni Institutu Superior Filosofia no Teologia Widya Sasana, Malang ne’e dehan tan, jerasaun ida iha tranzisaun, idade tranzisaun ne’e sai hanesan ponte ida atu halo tranzisaun pasífika husi jerasaun tuan ba jerasaun foun.
“Sei konsege tempu ida ne’e, hau sei halo tranzisaun pasífika ba jerasaun foun atu prepara jerasaun foun sai diak liu tan atu hasoru futuru,” tenik Fatuk Mutin.
Nune’e, nia iha vizaun hanesan koezaun relasionamentu ho amizade, armonia, no estratifikasaun sosial entre sidadaun ho baze fundamental iha lisan ne’ebé mak iha. Lisan harii instituisaun bo’ot rua hanesan Fetosan no Umane. “Koezaun ne’e mak halo ita metin, agora ita dehan nasaun soberanu, povu soberanu no estadu soberanu, sei ita laiha koezaun no unidade, ita la lori nasaun ne’e to’o agora.”
Nia hatutan, nasaun soberanu iha buat ne’ebé fundamental hanesan aspeitu fiziku iha soberania terestre ne’ebé hetan ona maibé, problema ituan Timor-Leste nian iha fronteira maritima ne’ebé agora sei halo negosiasaun.
Fatuk mutin realsa, povu soberanu katak poder supremu iha povu nia liman, iha identidade, iha kultura forte, kaer metin no iha poder atu delega intidade estadu hodi harii estadu ne’e.
Estadu soberanu ne’e tenke hamrik iha povu ida soberanu, kuandu ita kulia kona ba funsionamantu iha sistema politika ne’bé mak iha, Timor-Leste iha sistema politika semi prezidensial. “Estadu soberanu hamutuk ho povu, tenke kria estadu partisipativu, atu oinsa involve povu ne’e iha prosesu dezenvolvimentu”.
Tipu kampanha kandidatu PR númeru 1 ne’e, sei halo kampanha komísiu iha distritu balun no sei iha brosura atu fahe ba povu. Tuir orariu ne’ebe aprova hosi Commisao Nacional de Elecoes (CNE), kandidatu ho numeru ida ne’e sei hahu nia kampana iha Ainaro no remata nia kampana iha Dili, 17 Marsu 2017.
Jornalista: Julia Chatarina / Editor: Gantry Meilana
