BAUCAU (TATOLI) — Jogu jornada haat primeira divizaun Liga Futebol Amadora (LFA) époka daruak ne´ebé hala´o iha Estádiu Munisipál Baucau, Domingu (26/03/2017), Cacusan CF kontinua mantein nia pozisaun impata hanesan iha jornada datoluk liu-ba.
Iha jogu kontra Zebra FC iha horsehik ne´e, Cacusan halo impata de´it jogu ho Zebra hafoin ekipa Kuda Makerek (Zebra) rezulta golu dauluk liuhusi jogadór avansadu, Marcos de Lima, iha minutu 67. Iha minutu 79, defeza Zebra Camílio Pereira (4) halo failansu iha nia grandeia rasik tanba “oho án” (gol bunuh diri). Golu ida ne´e akontese hafoin Camílio tenta atu salva bola hosi avansadu adversáriu, Angelo Fernandes (11), maibé bola semo fali ba iha nia rede rasik.
Golu impata refere, lori Cacusan nia pontus sa´e ba 4 hanesan ho Zebra. Maibé, Cacusan hetan diferensa golu ne´ebé di´ak liu kompara ho Zebra tanba Cacusan impata dala haat maibé nunka lakon. Enkuantu, Zebra lakon dala rua, manán dala ida no impata dala ida. Tanba ida ne´e, provizoriamente Cacusan sees hosi zona degradasaun.
Sai vensedór temporáriu durante jogu jornada haat maka AD SLB Laulara ho golu 10, Carsae FC golu 6, AS Ponta Leste 5, Académica FC 5, Cacusan CF 4, Zebra FC 4 no Porto Taibessi 0. Zebra FC no Porto Taibessi maka oras ne´e hamriik iha zona mean (degradasaun).
Jornalista: Xisto Freitas / Editor: Gantry Meilana
