DILI, (TATOLI) – Sobrevivente Masakre 12 Novembru 1991 besik ema na’in 50 deside adere ba Partidu Demokrátiku (PD) ho razaun partidu refere iha prinsípiu ne’ebé di’ak, ko’alia kona-ba relijiaun, justisa, demokrasia, solidariedade no igualdade.
“Tanba ida ne’e maka konvense ami adere ba Partidu Demokrátiku maibé la’ós afiliasaun. Ami mai iha PD ho individualmente, la’os lori organizasaun Komité 12 Novembru”, reprezentante sobrevivente, Januario Gomes ba jornalista sira hafoin simu tomada pose hosi prezidente PD iha salaun Esperansa, Delta Dili, domingu.
Nia haktuir katak Prezidente PD maka hasai karta kredensiál ida hodi konvida sobrevivente hirak ne’e tama iha PD.
Gomes informa sobrevimente Masakre Santa Kruz komunga palavra de órden “ukun rasik án” hodi FRETILIN maibé sira la adere ba FRETILIN tanba tenke hamriik iha partidu ket-ketak para haburas demokrasia.
“Ita ukun án ona, ita iha responsabilidade morál atu liberta povu ida ne’e hosi kiak no mukit maibé tenke tama iha partidu ket-ketak. Sé karik ita hotu hamutuk iha FRETILIN, demokrasia sei la moris tanba maioria”, esklarese.
Iha biban ne’e, Prezidente partidu, Mariano Sabino Assanami orgullu simu sobrevivente hirak ne’e no hateten katak sobrevimente sira ne´e mai iha fatin ida ne’ebé merese duni, mai iha partidu ida moos no partidu ida kontinuadór.
“Ita nia partidu la’ós de´it hanoin oinsá ita ba iha Parlamentu no túr iha governu, maibé atu haklaken ita nia istória, atu haklaken ita nia funu na’in sira iha fatin ne’ebé merese respeitu”, hatutan.i
Lideransa ne’e konsidera katak sobrevimente sira ne’e la mai hanesan afiliasaun no la mai hanesan ema foun maibé mai duni iha sira nia uma lisan rasik.
Jornalista: Xisto Freitas
Editora: Rita Almeida
