DILI (TATOLI)—Igreja Katólika liuhusi Dioseze Dili sei organiza Konsertu ba Páz ne´ebé sei hahú hosi Igreja Motael to´o iha Largo Lecidere iha Sábadu (17/6) tuku 17:00-22:00, ho objetivu atu estabelese páz ba eleisaun parlamentár.
“Atividade hirak ne´e hakarak hafanu fali komunidade sira no prezidenti partidu sira hotu para pasénsia mantein nafatin kultura dame iha ita nia rain,” Prezidenti Komisaun Organizadora Konsertu ba Páz, Pe. João Soares ba jornalista sira iha Palásiu Prezidénsia Repúblika, Bairu-Pité, Dili, tersa ne´e, hafoin ramata inkontru ho Prezidenti Repúblika, Dr. Francisco Guterres Lú-Olo.
Amu João informa katak sira husu Prezidenti Repúblika nia apoiu ba konsertu ida ne´e no husu mós Prezidenti Repúblika atu prezensa iha Konsertu ba Páz refere.
“Prezidenti Repúblika nia pontu devista katak ne´e atividade ida ne´ebé maka fó ninia impaktu pozitivu. Nia (Prezidenti) rasik apresia no hakarak atu partisipa kuandu laiha ajenda ruma ne´ebé maka difikulta nia,” nia haktuir.
Nia hatutan reprezentante partidu ida-idak sei hetan oportunidade atu hato´o mensajen dame iha konsertu ne´e. “Husu ba komunidade hotu-hotu atu partisipa iha Konsertu ba Páz tanba objetivu finál hosi Konsertu ba Páz ne´e maka dame ninian no husu mós atu ema ida-idak iha konsiénsia konsidera páz hanesan kultura Timor ninian,” Amu propoin.
Tuir nia haree katak dezafiu ne´ebé akontese iha eleisaun parlamentár maka esteitmentu krítika ne´ebé manas. Iha nasaun demokrátiku, nia tenik, sé de´it bele hasai esteitmentu manas maibé komunalmente labele konsidera ne´e hanesan obstáklu.
Komisaun Organizadora sei konvida artista sira nasionál hanesan Maria Vitória, Gerson Oliveira no sira seluk hodi halo konsertu. Grupu Banda Múzika 5 de Oriente maka sai hanesan responsável ba banda múzika ninian. (Jornalista: Xisto Freitas)
