DILI (TATOLI)-Primeiru Ministru Rui Maria de Araújo apela ba povu atu respeita malu hodi evita violensia durante partisipa iha kampaña Partidu politiku ba eleisaun Parlamentár.
Lidér governu hato’o mensagen ne’e relasiona ho atividade kampaña husi PARPOL sira ba eleisaun Parlamentár ne’ebé sei hahu iha loron 20 Juhño to’o loron 19 fulan Julho 2017.
ʺHusu ba sidadaun hotu atu partisipa ho Civismu katak iha maturidade politika, respeita malu nafatin maski iha difrensas ideas entre partidu politiku sira, maibe ida ne’e maka parte ida husi demokrasia,ʺ Rui apela ba Jornalista sira iha Palasiu Prezidensiál Bairo-Pite Dili Segunda (19/06).
Líder governu mós rekomenda ba povu intende didiak programa husi Partidu politiku hodi fo votu iha eleisaun Parlamentár iha loron 22 fulan Julho.
ʺEleitor sira tenki haree didiak partidu politiku ne’ebé iha programa di’ak la’ós tempu para atu insulta malu, la’ós atu baku malu, maibé tempu atu ezerse direitu civiku, hodi rona didiak lider politiku no partidu ne’ebé bele lori dezenvolvimentu sosiu ekonomiku mai ita nia rai, ʺ Rui fó hanoin.
Maibe, Lidér governu husu atu povu kontinua mantein paz no estabilidade durante kampaña to’o resultadu eleisaun Parlamentár.
(Jornalista:Agapito dos Santos, Editór : Manuel Pinto).
