DILI, (TATOLI) – Prezidente Repúblika, Francisco Guterres Lú Olo, kondekora eis-Komandante Jerál Polísia Nasionál Timor-Leste (PNTL), Komisáriu Júlio Hornay, ho medalla méritu relasiona ho kontribuisaun durante tinan haat lidera instituisaun iha ámbitu selebrasaun tinan PNTL ba-dala XIX iha Sentru Formasaun Komoro, ohin.
Kondekorasaun ne’e bazeia ba dekretu prezidensiál númeru 15/ 2019, 18 marsu hodi rekoñese no mós agradese ba kontribuisaun sidadaun sivíl, militár no polísia nasionál no internasionál.
“Kondekorasaun ho medalla méritu ne’ebé ha’u deside fó ba señor Komisáriu Júlio da Costa Hornay, signifika apresiasaun ba servisu ho kompeténsia ne’ebé hala’o”, dehan Xefe Estadu iha ninia diskursu.
Iha okaziaun hanesan Estadu mós atribui medalla merítu ba seguransa públika primeira klase ba administradór munisípiu Aileu, João Tilman do Rego, no administradór munisípiu Ainaru, Albertinho de Aráujo.
Nune’e mós medalla méritu klase da-ruak fó ba Tenente Koronél F-FDTL, Cesário Marçal Ximenes ‘Haksolok’, Tenente Koronél F-FDTL, Marcelino Ximenes Rizai no Majór F-FDTL, Abel da Costa Xavier Niki.
Alende timoroan, Xefe Estadu kondekora mós medalla méritu seguransa públika klase da-ruak ba superintendente Geoff Turner hosi Programa Dezenvolvimentu Polísia Timor-Leste (TLPDP-sigla inglés) no ajente Federal Ross Andrew William hosi TLPDP.
Nune’e mós kondekora medalla servisu distintu grau prata (osan mutin) ba majór Felisberto Portugués Contente hosi Guarda Nasionál Republikana (GNR).
Iha momentu hanesan entrega mós sertifika apresiasaun ba inspetór Polísia Aleixo Jorge da Costa no Tenente F-FDTL, Clementino da Costa Samodok.
Jornalista: Agapito dos Santos
Editora: Rita Almeida
