DILI, 05 setembru 2019 (TATOLI)-Primeiru-Ministru (PM), Taur Matan Ruak, hato’o sentidu kondolénsia ne’ebé kle’an ba família enlutada, saudozu Lucas da Costa, kódigu Rama Metan atuál Reitór Universidade da Páz (UNPAZ) no Fundadór RENETIL ne’ebé husik ona mundu ohin, loron 5 setembru 2019 dadersán tuku 08:00 iha Ospitál Nasionál Guido Valadares (HNGV, sigla portugés).
“Sente triste rona notísia ida ne’e, Timor-Leste lakon timoroan matenek di’ak ida ne’ebé dedika nia aan tomak ba área edukasaun hanesan Reitór UNDIL (eis) no UNPAZ (atuál) hodi kontribui ba ita-nia rekursu umanu”, Xefe Governu ne’e hato’o liuhusi komunikadu ne’ebé Tatoli asesu hosi Gabinete PM, ohin.
Hatutan la’ós ne’e de’it, iha tempu okupasaun, nia mós kontribui ba nasaun nia luta liuhosi Rezisténsia Nasionál Estudante Timor-Leste (RENETIL) hodi ohin sai nasaun ida livre no independente.
“Aproveita okaziaun ne’e hakarak hato’o ha’u-nia sentidu profundu kondolénsia ba família saudozu nian ne’ebé triste hela tanba lakon ema di’ak hosi sira-nia leet. Ita hotu reza ba nia atu nia klamar simu iha Na’i Maromak nia Kadunan Santu moris rohan laek hodi kontinua tau matan ba nia família no ita hotu hodi kontinua obra ne’ebé nia husik hela iha mundu ne’e”, PM Taur dehan.
Notísia relevante : Na’in Ba Rai no Lalehan Bolu Hikas “Rama Metan”
Jornalista : Antónia Gusmão
Editora : Maria Auxiliadora
