BAUCAU, 12 outubru 2019 (TATOLI)–Prezidente Repúblika (PR), Francisco Guterres Lú Olo ho espoza hala’o vizita ba lagoa masin-fatuk iha Suku Nunira, Postu Administrativu Laga, Munisípiu Baucau, sábadu ne’e.
Prezidente Repúblika hetan konvite hosi veteranu no atuál deputadu bankada Partido Libertação Popular (PLP), Cornélio Gama ‘L7’ hodi hala’o vizita ba masin-fatuk ne’e.
L7 ba TATOLI hateten, Xefe Estadu haree ona riku-soin Timor nian hanesan masin iha fatin barak ona, maibé vizita mai masin-fatuk iha Nunira ne’e foin mak primeiravez.
“PR haree ona riku-soim barak iha Timor, maibé masin-fatuk iha Nunira ne’e PR foin primeiravez mai haree”, L7 haktuir.
Nia hatutan, durante vizita, nia mós fó hanoin ba Prezidente Repúblika atu oinsá mak halo esplorasaun ba masin ne’e, nune’e bele halo esportasaun ba nasaun seluk.
Tuir planu, ohin (13 outubru), L7 organiza populasaun hosi suku ualu ne’ebé pertense ba Postu Administrativu Laga, atu tuun hodi ra’ut masin ne’e durante fulan rua.
Nia informa katak bainhira ra’ut ona, sei tau hamutuk iha fatin ida, no sei konvida Prezidente Repúblika, Primeiru-Ministru no membru Governu atu partisipa iha rituál ne’ebé sei oho karau, fahi no manu, hafoin populasaun ida-idak sei lori ba nia uma.
“Iha rituál ne’e sei oho karau, fahi, manu atu halo tuir tradisaun hanesan tinan-tinan halo ona, hafoin ida-idak bele lori masin ba nia uma”, nia esplika.
Iha okaziaun seromónia rituál ne’ebé sei hala’o, L7 sei koordena ho Governu no parte hotu oinsá mak bele halo produsaun ba masin ne’e, nune’e Governu mak bele responsabiliza produsaun refere.
“Ami sei koordena ho Governu oinsá mak Governu sai na’in ba produsuan masin fatuk refere, nune’e bainhira iha ema ruma halo boikota karik, Governu mak iha responsabilidade. Se lae, ema dehan ita hadau masin no seluk–tan”, veteranu ne’e haklaken.
Nia rekoñese katak tinan kotuk iha duni problema to’o ema mai tuda, maibé nia rezolve ona problema ne’e.
Jornalista: Cipriano Colo
Editór: Xisto Freitas
