DILI, 14 setembru 2020 (TATOLI)—Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, konsidera partidu polítiku sira-ne’ebé kaer ukun prátika “polítika klientilizmu”.
Notísia Relevante: CEPAD husu CAC hasa’e volume sensibilizasaun ba lei MPCC
Diretór CEPAD ne’e fundamenta sistema semi prezidensialista ne’ebé Timor-Leste adota di’ak tebes tanba ne’e la presiza halo mudansa.
João Boavida husu ba partidu foun sira-n’ebé foin mosu lalika lakon tempu ba sistema tanba sistema Timor-Leste nian di’ak tebes intermu instrumentu legál, instrumentu polítiku no instrumentu demokrátiku ne’ebé harii nasaun ida-ne’e.
Diretór CEPAD ne’e akresenta, sistema ne’ebé Timor-Leste adota kompara ho nasaun sira seluk Timor-Leste nia sistema mós di’ak.
“Ladi’ak ne’e mak ema. Ema ne’ebé implementa sistema ne’e ladi’ak. Ema sira-ne’ebé implementa sistema ne’e ladi’ak tanba ‘polítika klientilizmu’. Polítika klientilizmu ne’e dehan katak “ha’u-nia partidu manán ohin, aban sé mak sai ministru, aban sé mak sai asesór ha’u-nian, ema sira-ne’ebé halo buat ruma ba ha’u no halo buat ruma ba ha’u-nia partidu durante eleisaun. Ha’u la interese nia atu iha esperiénsia ka nia laiha koñesimentu ka nia atu iha méritu ruma ka ha’u la interese,” João Boavida informa ba Agência TATOLI iha nia kna’ar-fatin, Bidau, foin lalais ne’e.
Nia esplika, sira-nia interese mak duante fulan tomak kampaña eleitorál nia halo saida ba partidu entaun nia hetan fatin ba asesór, ba ministru, hetan projetu ho fasil no buat sira-ne’e hotu mak halo Timor-Leste nia sistema la’o ladi’ak no la’ós sistema mak ladi’ak.
Sistema ne’ebé Timor-Leste adota la’ós sai kestaun, tuir nia, maibé sistema ne’e kuandu la’o di’ak kuandu prosesu rekrutamentu ho baze bazea ba mértiu la’ós bazea fali polítiku klientilizmu.
“Atu la’o di’ak tenke méritu katak ema ne’ebé loos tenke tau iha fatin loos, ema kuziñeiru ba tuur iha dapur la’ós ema merese kuziñeiru ba tuur fali iha parlamentu nasionál ka sekretáriu estadu,” Diretór CEPAD ne’e hateten.
Tanba ne’e, nia fó hanoin ba partidu polítiku sira-ne’ebé kaer ukun katak serbisu administrasaun públika iha rai-ida-ne’e atu la’o di’ak, tenke hasees tiha polítika klientelizmu (politik perlindungan) ne’e.
Jornalista: Evaristo Soares Martins
Editór: Cancio Ximenes
