DILI, 12 novembru 2020 (TATOLI)–Prezidente Repúblika, Francisco Guterres Lú Olo, husu ba sosiedade hotu iha territóriu Timor laran tomak atu labele jeneraliza juventude agora sai autór ba konflitu.
“Ha’u hanoin la’ós joven hotu mak envolve iha konflitu maibé iha mós juventude lubuk oan ida-ne’ebé mak tau an nafatin hodi imita (ezemplár) onra pasadu ne’ebé mak juventude 12 novembru 1991 uluk sosa ho isin, ruin no raan,” Prezidente Repúblika, Francisco Guterres ‘Lú Olo’, nia hateten ba jornalista sira hafoin partisipa selebrasaun Masakre Santa Crúz ba dala-XXIX no Loron Nasionál Juventude ba dala-15 iha simenteriu Santa Crúz, Dili, kinta ne’e.
Tanba ne’e, Xefe Estadu ne’e husu ba ema hotu-hotu atu labele jeneraliza katak joven sira agora ne’e la tau valór luta ninian no juventude mak sai fali autór ba konflitu ne’e, hosi nia parte konsidera hanesan la loos.
“Dalabarak mosu problema, ita rona sira-ne’ebé mak envolve iha arte marisiál maibe la’ós arte marsiál, maibé ema pesoál ne’ebé mak involve iha grupu arte marsiál sira. Ema balu ne’ebé mak halo duni konflitu maibé barak mós hakarak moris kontinua hakmatek ho valór sosiedade ninian no loron importante sira-ne’e,” nia tenik.
Jornalista: Domingos Piedade Freitas
Editór: Cancio Ximenes
