DILI, 13 novembru 2020 (TATOLI)—Prezidente Konsellu Kombatente Libertasaun Nasionál (KKLN), Vidál de Jesus “Riak Leman”, konvida Prezidente Repúblika Francisco Guterres ‘Lú-oló ho partisipa no halo abertura ba asembleia jerál KKLN nian ne’ebé mak SEI hala’o iha 18-20 novembru tinan ne’e.
“Ohin, ami mai konvida Prezidente Repúblika Francisco Guterres ‘Lú-oló hodi halo abertura ba ami-nia asembleia jerál ne’e. Maibé, Prezidente Repúblika mós iha programa atu ba Munisípiu Ermera maibé nia sei koordena oinsá para partisipa no halo abertura,” Prezidente KKLN, “Riak Leman” afirma ba jornalista sira iha Palásiu Prezidénsia Nicolau Lobato, Bairru-Pité, Dili, sesta ne’e.
Nia informa, Primeiru-Ministru labale partisipa asembleia jerál KKLN nian tanba PM iha Konsellu Ministru iha kuarta-feira loron hanesan tanba ne’e PM mak sei ensera serimónia refere.
“Asembleia Jerál KKLN ne’e ita-nia Prezidente Repúblika Francisco Guterres ‘Lú-oló hodi partisipa no halo abertura eventu ne’e,” nia dehan.
Nia dehan, Asembleia Jerál ne’e realiza hodi KKLN aprova nia planu estratéjiku sira ne’ebé mak ekipa tékniku prepara ona no rezimentu asembleia nian inklui ho bandeira no logotipu maibé atu implementa ne’e depende ba orsamentu ne’ebé mak iha.
Kona-ba programa veteranu ne’ebé mak luta iha ai-laran durante tinan 24 ne’e, nia dehan, sei hein Orsamentu Jerál Esatdu 2021 nian bainhira aprova ona mak bele halo prosesu.
Nia hatutan, prioridade seluk mak halo uma ba veteranu tinan 24 hamutuk 60. Entre sira-ne’e barak mak kontinua ho kondisaun moris iha terús no susar, tanba ne’e mak MAKLN hanoin atu halo uma ba sira.
Nia haktuir, planu halo uma veteranu nian ba 2021 sei aumenta tan 40 no restu hela na’in-11 no barak mak mate ona maibé ida ne’e sei haree.
Kona-ba re-verifikasaun ba veteranu, Riak Leman hateten, antes ne’e hala’o ona maibé Governu la’o ho Orsamentu Duadésimu Temporária (DOT) entaun labele kontinua.
Maibé, nia dehan, hein Orsamentu Jerál Estadu (OJE) 2021 mak aprova entaun sei kontinua halo verifikasaun ba veteranu ne’ebé seidauk rejistu no halo re-verifikasaun ba naran ne’ebé mak rejistu ona.
Tuir nia, Sekretáriu Estadu Kombatente Libertasaun Nasionál (SEAKLN) koordena ona ho veteranu sira atu transfere osan ba veteranu ida-idak nia konta bankária depois mak ekipa tékniku hosi ministériu avalia.
“Agora ita planu halo uma tuir mekanizmu ministériu ne’e nian mak halo iha ida-idak nia moris fatin,” Riak Leman hateten.
Entretantu, nia dehan, edifísiu ba KKLN serteza ona mak iha Arte Moris nia fatin maibé hein orsamentu bainhira aprova ona entaun halo reabilitasaun ba edifísiu refere.
Jornalista: Osória Marques
Editór: Cancio Ximenes
