DILI, 08 marsu 2021 (TATOLI)—Reprezentante Povu iha uma fukun Parlamentu Nasionál, konsidera foos saka 680 ne’ebé to’o ona iha Postu Administrativu Fatumean ne’e la sufisiente tanba uma kain iha postu administrativu refere besik rihun-ida.
Notísia Relevante: MKAE orienta CLN prepara distribuisaun foos ba Covalima-Bobonaro
Membru Parlamentu Nasionál, Deputadu Alexandrino Cardoso, haktuir, iha loron domingu, 07 marsu ne’e, foos saka 680 to’o ona iha Postu Administrativu Fatumean.
“Maibé ida-ne’e la sufisiente tanba Fatumean iha xefe família hamutuk 900-resin. La’ós de’it Fatumean mak presiza nesesidade bázika maibé kuaze Covalima tomak, liuliu Postu Administrativu sira iha fronteira hanesan Fatumea, Tilomar, Fohorem no Fatululik,” nia levanta liuhosi plenária PN, segunda ne’e.
Nia fó-sai katak, foos atu sosa saka ida ho $20 mós laiha ona dezde loron domingu ne’e, tanba ne’e Governu presiza tau atensaun.
“Ba ita sira-ne’ebé sei konsumu batar no ai-farina sei augenta maibé ba ferik, katuas no labarik kiik-oan sira kuitadu, tanba Governu rasik mós fó apoiu, parte balun hosi pesoál ka individual, grupu no instiuisaun ne’ebé ho fuan fó ona apoia ba Covalima, hanesan Covalima-oan agradese,” nia agradese.
Nia husu ba Governu atu halo lalais intervensaun ba merkadu, tanba stoke foos iha Covalima laiha ona.
Nia mós husu ba Governu liuhosi Sentru Lojístika Nasionál (CLN-sigla portugés) tenke haree kestaun ne’e ho sériu.
Oras ne’e, nia haktuir, situasaun iha Covalima hosi suku ba suku no aldeia ba aldeia mós laiha ona movimentasaun.
Nia fó hanoin ba Governu, bele lockdown maibé atividade ekonomia tenke la’o nafatin nune’e povu labele mate tanba hamlaha.
“Mate tanba COVID-19 pelumenus, maibé tanba hamlaha oinsá ita-nia dignidade nu’udar nasaun ida. Tanba ne’e, ho haraik-aan husu Governu atu haree kestaun sira-ne’e ho sériu,” nia dehan.
Notísia Relevante: CUAT fó apoiu foos saku 70 ba komunidade Covalima
Burokrasia halo povu Fatumean seidauk bele simu foos
Jornalista: Evaristo Soares Martins
Editór: Cancio Ximenes
