DILI, 12 jullu (TATOLI)—Ministériu Asuntu Kombatente Libertasaun Nasionál (MAKLN), iha trimestre dahuluk no daurak ne’e ezekuta ona 50% hosi Orsamentu Jerál Estadu (OJE) 2021 ho montante $100.117.580.
Notísia Relevante: OJE 2021, MAKLN ezekuta ona millaun $25
Diretora Nasionál Administrasaun Finansa (DNAF), Rosa da Costa Gomes, hosi ezekusaun 50% ne’e, ba saláriu vensimentu 45% (rihun $279) hosi totál osan aprovadu iha rihun $619, bens servisu 41% (millaun $2.9) hosi totál millaun $7 no kapitál menór 99% (rihun $324) hosi osan aprovadu rihun $329, kapitál dezenvolvimentu 82% (millaun $1.4) hosi osan aprovadu millaun $1.7, no transferensia públiku 50% (milliaun $45.3) hosi montante aprovadu millaun $90.6.
“OJE 2021 nian ne’ebé mak prevee ba MAKLN hamutuk $100.117.580 no totál gastu hamutuk $50.210.683,11,” Rosa da Costa ba Ajénsia TATOLI, liuhosi telefónika, segunda ne’e.
Aleinde ne’e, nia informa, MAKLN iha programa rua ne’ebé mak implementa iha trimestre daruak ne’e mak boa-governasaun no rekoñesimentu no valorizasaun ba veteranu sira maibé kona-ba validasaun ba segundu rejistu mak atu la’o maibé sei hein pedidu ba orsamentu ne’e.
Programa bolsu estudu ba tinan ne’e, nia dehan, to’o agora labele ezekuta tanba situasaun pandemia COVID-19, entaun osan ba bolsu estudu nian ne’e lori trata fali ba veteranu sira-ne’ebé moras no presiza halo atendmentu urjente iha rai-li’ur.
Jornalista : Osória Marques
Editór : Cancio Ximenes
