DILI, 02 setembru 2021 (TATOLI)—Diretór Ajénsia Nasionál Akreditasaun no Avaliasaun Akadémiku (ANAAA), Edmundo Viegas da Silva informa, iha trimestre dahuluk no daruak ne’e ANAAA ezekuta ona 30 % hosi totál Orsamentu Jerál Estadu 2021 hamutuk $426,865.
Notísia Relevante: OJE 2021, ANAAA foin ezekuta 12%
“Hosi janeiru to’o agostu ne’e, trimestre dahuluk no daruak ne’e, ami-nia ezekusaun orsamentu jerál estadu 2021 ne’e foin ezekuta 30%,” Edmundo Viegas da Silva, hateten ba Agência Tatoli, iha nia knaar-fatin, INFORDEPE, Balide, Dili, kinta ne’e.
Razaun balun, nia dehan, tanba daudaun ne’e maske ANAAA halo ona avaliasaun maibé tanba seidauk ezekuta pagamentu ba avaliadór nasionál no internasionál lubuk ida agora halo hela avaliasaun ba instituisaun ensinu superiór sira entaun posivelmente Q3 ramata mak foin bele haree mudansa boot oituan.
“Ida-ne’e akontese tanbá ami seidauk selu avaliadór sira no avaliadór sira sei iha prosesu halo servisu nia laran. Bainhira sira servisu hotu ona, sira hatama relatóriu mai ona, mak ANAAA foin halo pagamentu ba sira,” nia dehan.
Razaun seluk, ANAAA iha mós verba ida ho totál $60.000-resin ba kapitál menór, ida-ne’e sasán balun hatama ona maibé tanbá sei falta sasán balun inklui kadeira sofa sira seidauk hatama, entaun ANAAA seidauk bele halo pagamentu.
“Ami iha buat oin tolu mak ida mobiliáriu ba edifísiu nian, equipamentus IT hanesan laptop, komputér ho sasán balun atu ba halo avaliasaun nian maibé sasán seidauk tama. Ida ikus-liu, ami halo tiha ona kontratu atu hatama karreta no motor ida maibé seidauk to’o mai. Se ida ne’e mak ami selu hotu tiha ona ne’e, ami bele sa’e to’o 50% ka 60% ona,” nia esplika.
Notísia Relevante: Ezekusaun OJE 2021 atinje millaun $872,3 reprezenta 43%
Jornalista : Nelia Fernandes
Editór : Cancio Ximenes
