DILI, 22 marsu 2022 (TATOLI)—Kandidatu Prezidente Repúblika (PR) períodu 2022-2027 ho númeru sorteiu 05, Anacleto Bento Pereira, hateten bainhira ema hatene Partidu Demokrátiku Repúblika Timor (PDRT) nia lema ”Tempu To’o Ona Hamutuk ho Ha’u, Ita Tane Aas no Halulik Fila Fali Lei Inan” ne’e, ema sei hatene PDRT atu apoiu kandidatu PR ida-ne’ebé iha eleisaun segunda volta.
Nia hateten, tanba PDRT mak kandidata nia ba Prezidente Repúblika 2022-2027 entaun desizaun atu fó apoiu ba kandidatu PR José Ramos Horta ho votu 301.481 (46,58%) no Francisco Guterres ‘Lú Olo’ ho votu 143.408 (22,16%) ne’e, tenke liuhosi desizaun Orgaun Partidariu ida-ne’ebé aas liu iha partidu laran.
“Ha’u-nia kandidatura ne’e reprezenta partidu ida, entaun desizaun labele kandidatu mesak mak foti, maibé tenke liuhosi Orgaun Partidáriu ida ne’ebé ass liu iha partidu laran mak bele foti. Ami ko’alia ona iha ohin dadeer, maibé ofisiálmente sei halo liuhosi komunikadu ida-ne’ebé prezidente partidu rasik mak sei hato’o. Em prinsipiu, hanesan ohin ha’u dehan ona, hosi ami-nia lema de’it bele fó ona kompreensaun ida katak ami atu apoia kandidatu PR Horta ka Lú Olo,” Anacleto Bento Pereira hateten ba Agéncia Tatoli, via telefónika, tersa ne’e.
Durante ne’e, nia dehan, nia parte hetan ona kontaktu hosi partidu rua hanesan CNRT no FRETELIN atu fó apoia maibé sei desisaun hosi estrutura partidu nian.
“Hanesan baibain polítika nia lala’ok ne’e iha komunikasaun ona hosi partidu rua ne’ebé sira-nia kandidatu atu tama ba segunda volta. Maibé, komunikasaun ne’e normál atu to’o desizaun ne’e sei liuhosi prosesu lubuk oan ida-ne’ebé felizmente ami liu tiha ona iha ohin maibé komunikasaun ofisiál tenke feitu hosi Prezidente, ne’ebé mak ho kompetensia kedas,” nia dehan.
Nia espera kandidatu rua ne’ebé bainhira eleitu ba Prezidente Repúblika tenke sai aman ba Nasaun, labele sai aman ba Partidu Congresso Nacional de Reconstrução de Timorense (CNRT) ka Frente Revolucionária de Timor-Leste Independente (FRETILIN).
Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi PDRT ba períodu 2022-2027 ho númeru sorteiu lima (5), Anacleto Bento Ferreira, hetan votu 13.059 (2,o%), ne’ebé hela iha pozisaun neen (6) entre kandidatura 15 seluk.
Aleinde ne’e, nia konsidera ninia kandidatura ba PR ne’e sai hanesan sasukat no susesu ida ba Partido Democrático da República de Timor (PDRT), tanba rezultadu apuramentu munisipál ne’e nia okupa fatin dahitu hosi kandidatu PR na’in-16 ne’e.
“Ha’u hanoin, ha’u-nia primeira aparensia vida polítika nasionál ba ha’u sente individuálmente ne’e susesu ida, tanba ho ha’u-nia primeira aparensia ne’e fó kedas rezultadu ida ne’e no rezultadu ne’ebé ha’u hanoin seida’uk to’o lolos másimu, tanba partisipasaun ne’e sei minimu hela. Rezultadu ne’e, ba ami kontribuisaun partidu nian pozitivu tebes. Tanba ne’e ha’u hanoin ne’e susesu ida mai partidu,” nia dehan.
Nia informa, PDRT mós iha hela faze organizasaun no foin mak monta estrutura iha munisípiu sira iha fulan tolu ka haat nia laran, sira deside tuir eleisaun, tanba ida-ne’e hanesan meiu ida atu koko sira-nia forsa polítika no atu hatene militante sira-nia fidelidade ba partidu.
Jornalista : Nelia Fernandes
Editór : Cancio Ximenes
