iklan

HEADLINE, SAÚDE

Laiha kualidade, MS apela labele fó aimoruk “dexamethasone no simvastatin” ba pasiente

Laiha kualidade, MS apela labele fó aimoruk “dexamethasone no simvastatin” ba pasiente

Aimoruk Dexamethasone tablet hosi India.Imajen/Espesial

DILI, 16 juñu 2022 (TATOLI)— Ministériu Saúde liuhosi Diresaun Nasionál Farmasia no Medikamentu, apela ba fasilidade saúde iha territóriu nasionál atulabele fó aimoruk dexamethasone tablet no simvastatin ba pasiente sira tanba halo teste iha laboratóriu Therapeutic Goods Administration (TGA) Austrália hatudu laiha kualidade.

Aimoruk dexamethasone tablet mak medikamentu kortikostóide ne’ebé funsiona atu prevene liberasaun substánsia ne’ebé kauza inflamasaun ba isin. Aimoruk ne’e  dala barak uza halo tratamentu ba kondisaun hotu liuliu alerjia no  problema iha isin. Enkuantu aimoruk simvastatin uza atu hatun kolesterol ne’ebé fó efeitu maka’as ba moras katarata.

Diretór Nasionál Farmasia no Medikamentu, Delfim da Costa Xavier Ferreira, informa iha tinan 2021, Ministériu Saúde ho laboratóriu Therapeutic Goods Adminsitration (TGA) Austrália halo selebra akordu atu halo teste ba kualidade aimoruk sira ne’ebé sosa ho Servisu Autonómu Medikamentu no Ekipamentus Saúde (SAMES) ho gratuitu.

“Ami fó ona orientasaun ba superiór sira iha faslidade saúde iha territóriu nasionál atu halo identifika no rekolla aimoruk item rua hodi labele fó tan ba pasiente sira tanba laiha kualidade. Item rua ne’e tratamentu ba moras infesaun no anti alerjia, maibé ita prepara ona nia-subtituisaun  iha para mediku sira bele fó ba pasiente sira,”Diretór ne’e hateten ba Agência TATOLI iha Otél Timor, kinta ne’e.

Iha tinan ne’e, MS haruka aimoruk-item lima, maibé iha teste laboratóriu iha item rua hanesan Simvastatin no dexamethasonelaiha kualidade.

“Ita bele dehan aimoruk rua ne’e nia-persentajem menus liuhosi nia padraun ne’ebé mak iha nune’e ita  dalaruma fó ba pasiente sira hemu la pasa, maibé kontinua moras nafatin,” nia esplika.

 Medikamentu ne’ebé mak laiha kualidade ne’e SAMES kompra husi nasaun India no distribui ona ba fasilidade saúde iha territóriu nasionál.

Nia esplika, teorikamente iha fatór barak mak kontribui halo kualidade aimoruk ne’e bele muda hanesan  hahú husi produsaun, hafoin transporta mai ho avian ka ró la seguru iha kontentór no too portu Dili mak rai kle’ur , mak hasai ba rai iha armazein SAMES no distribui  ba munisípiu mak la seguru bele kauza ba kualidade aimoruk.

“Maibé, ita deskonfia ona katak orijen iha fabrika mak laiha kualidade duni. Kuantidade aimoruk ha’u laiha serteza tanba SAMES mak halo kompra no distribui on aba munisípiu sira” nia afirma.

Nune’e, Resposavél ne’e agradese Therapeutic Goods Adminsitration (TGA) Austrália  ne’ebé konsege deteta aimoruk ne’ebé laiha kualidade hodi bele proteje  povu nia saúde.

“Rezultadu teste ne’e ajuda tebes tanba hakarak proteje povu nia saúde, nune’e ita kontrola  kedas hosi SAMES atu rekolla kedan aimoruk sira ne’ebé laiha kualidade hodi labele afeita ba povu nia saúde,” nia agradese.

Ministériu Saúde liuhosi SAMES servisu hamutuk ho Organizasaun Mundiál Saúde inklui nasaun 11 atu partilla informasaun ba malu karik hetan aimoruk falsu ne’ebé espalla iha Timor-Leste bele relata hodi halo asaun atu labele afeta ba populasaun nia saúde.

Jornalista : Felicidade Ximenes

Editór       : Florencio Miranda Ximenes

iklan
iklan

One Comment

  1. Maibe maske detecta laiha kualidade mos saugati dt tmba fakar tih ona osan Barak hodi sosa!

Leave a Reply

iklan
error: Content is protected !!