iklan

NASIONÁL, HEADLINE, KAPITÁL

MAP planeia alarga planta ai-kameli ektare 100 iha munisípiu rua

MAP planeia alarga planta ai-kameli ektare 100 iha munisípiu rua

Diretór-Jerál Floresta, Kafé no Plantasaun Industriál, Raimundo Mau. Imajen Tatoli/Francisco Sony

DILI, 13 janeiru 2023 (TATOLI)—Ministériu Agrikultura no Peska (MAP) liuhosi Diresaun Nasionál Floresta, Kafé no Planta Indústria, planeia alarga planta ai-kameli ektare 100 iha munisípiu Covalima no Bobonaro.

Ita iha planu atu alarga kuda ai-kameli iha rai ektare 100 iha tinan ne’e, kompostu hosi ektare 50 iha suku Zulo, postu administrativu Zumalai, munisípiu Covalima no ektare 50 iha área Manduki, suku Ai-daba leten, postu administrativu Atabae, munisípiu Bobonaro,” Diretór Jerál Floresta, Kafé no Planta Indústria, Raimundo Mau, hateten, liuhosi programa entrevista eskluziva iha estúdiu Agência Tatoli, kinta ne’e.

Aleinde kuda ai-kameli, MAP mós halo manutensaun ai-kameli sira ne’ebé tinan kotuk kuda, enkuantu fatin kuda ai-kameli ne’e iha área Estadu nian.

“Ita kuda iha Manduki tanba iha ektare 1.000 iha plantasaun aiteka no rai sorin sei mamuk, entaun ita hakarak kuda ho ai-kameli, nune’e mós ba Zulo,” nia akresenta.

Notísia relevante: PR Horta husu komunidade kuidadu ai-kameli

Diretór ne’e konsidera, ai-kameli iha valór ekonómiku boot, nune’e husu komunidade nia envolvimentu atu idaidaik bele kuda rasik maibé labele foti de’it mak ai-kameli ne’ebé antes ne’e iha ona.

“Ai-kameli nu’udar ai-fuik ida, maibé hanorin ita halo barak plantasaun sira, ne’ebé hosi diresaun ita iha tékniku sira ne’ebé mak prontu fó asisténisia ba komunidade ne’ebé kuda ai-kameli, nune’e hakbesik-an mai iha sentru viveiru sira atu foti ai-kameli oan ba kuda iha ida-idaik ninia espasu ne’ebé mak mamuk,” Raimundo tenik.

MAP daudaun ne’e kuda ona ai-kameli iha rai ektare 200 área indústria, iha área Manduki, Atabae, ho ninia kondisaun moris di’ak. Kada tinan sempre aumenta iha suku Zulo tanba ministériu iha senáriu tinan-30 mai bele kolleta ona área balun ne’ebé kuda ona desde inísiu.

Ai-kameli ne’ebé kuda iha Zulo no Manduki hanesan fatin konsentrasaun iha área boot, enkuantu área kiik sira hanesan pilotajen ektare rua no ektare lima ne’ebé mak ho Orsamentu Jerál Estadu ne’e namkari iha munisípiu sira.

Nune’e, MAP halo esforsu atu hasa’e produsaun ai-kameli no kontinua promove iha plantasaun rai privada sira liuhosi fornesimentu fini ai-kameli ba komunidade ne’ebé hakarak kuda.

“Ita kada tinan prodús ai-horis oin-oin no mós ai-kameli iha sentru viveiru permanente iha munisípiu sira atubele distribui iha parte interese sira hodi bele kuda iha sira-nia to’os,” nia dehan.

Daudaun ne’e, fatin permanente viveiru ne’e iha postu administrativu Maubara, munisípiu Liquiçá, ne’ebé hanesan viveiru sentrál kada tinan prodús espésie ai-horis 20 inklui ai-kameli no aumenta tan viveiru permanente tolu iha Betano iha Viqueque no Lautém.

“Iha Maubara bele prodús to’o 300.000 kahur ho ai-horis sira seluk, hanesan iha tinan kotuk ita prodús ai-oan besik 200.000, agora tempu udan monu rai, komunidade hahú foti kuda, maibé iha viveiru balun atu prodús de’it ai-kameli hanesan iha Zulo no Manduki ne’e, konforme nesidade kada tinan. Ita atu re-planta maibé kada tinan ita kuda mínimu iha rai ektare lima no ita prodús mós muda atu troka ba tinan kotuk ne’ebé kuda mate,” nia salienta.

Jornalista    : Arminda Fonseca

Editora         : Julia Chatarina

iklan
iklan

Leave a Reply

iklan
error: Content is protected !!