DILI, 27 marsu 2023 (TATOLI)— Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten fasilitadór na’in-60 tuir formasaun kona-ba lei no regulamentu sira hodi bele fasilita fali brigada no ofisiál eleitorál sira iha munisípiu no postu administrativu sira atu fó susesu eleisaun Parlamentar ne’ebé realiza iha 21 marsu tinan ne’e.
“Totál fasilitadór na’in-60 hosi territóriu nasionál. Kompostu hosi Diretór STAE Munisípiu, ofisiál votante munisípiu inklui ho Diretór no Xefe Departamentu STAE nasionál nian,” Acilino Manuel Branco, hateten ba jornalista sira, hafoin halo abertura formasaun ba fasilitadór STAE, iha Delta Nova, Dili, segunda ne’e.
Objetivu formasaun ne’e atu hasa’e no aumenta sira-nia koñesimentu, nune’e formadu sira sei kontinua fasilita tan formasaun ba brigada 1.400-resin no ba ofisiál eleitorál 1.800-resin iha territóriu nasionál.
Matéria ne’ebé sei atribui ba fasilitadór mak liga ho lei no regulamentu sira, nune’e bainhira iha prosesu eleisaun parlamentar ne’e sira bele fasilita eleitór sira.
Hafoin formasaun ne’e ramata, tuir ajenda formasaun ba brigada no ofisiál eleitorál hahú iha loron 3 abríl to’o 9 abríl.
Notísia relevante: Prezidente Repúblika dekreta loron eleisaun Parlamentár iha 21 maiu
Jornalista : Osória Marques
Editór : Florencio Miranda Ximenes
