DILI, 18 agostu 2023 (TATOLI)–Governu planeia realiza fórum negósiu internasionál iha fulan-outubru tinan ne’e, durante loron-tolu hodi ko’alia kona-ba planu investimentu sira ne’ebé hala’o iha Timor-Leste.
“Vise Primeiru-Ministru asuntu ekonómiku, Ajénsia TradeInvest ho parseiru balun hamutuk atu organiza fórum negósiu internasionál. Iha fórum negósiu ne’ebé sei realiza Governu aprezenta polítika iha área ekonomia ba tinan-lima nian,” Diretór Ezekutivu TradeInvest, Arcanjo da Silva, hateten ba Agência Tatoli, iha nia knaar fatin, Colmera, sesta ne’e.
Daudaun ne’e preparasaun la’o hela nune’e iha tempu badak estabelese komisaun ida ba realizasaun eventu internasionál ne’e no sei konvida investidór internasionál tantu sira ne’ebé investe ona no balun seidauk.
“Ami konkorda no ami prontu atu organiza atividade ne’e, tanba fórum negósiu sira hanesan ne’e importante tebes hodi ita halo promosaun ba rai-li’ur,” nia akresenta.
Notísia relevante : Timor-Leste sei realiza fórum negósiu naun pertrolíferu iha Expo Dubai
Diretór Ezekutivu dehan, TradeInvest realiza ona fórum negósiu desde mandatu VI Governu nian, hosi tinan sira to’o mai 2023 ne’e seidauk realiza tanba ho difikuldade oin-oin ne’ebé Governu hasoru hanesan impase polítika no COVID-19.
“Iha mandatu IX Governu ne’e ho governasaun ida forte tebes, entaun Vise Primeiru-Ministru asuntu Ekonomia propoin atu realiza fali fórum internasionál ne’e. Tanba estabilidade governativa di’ak maka ita bele konvida investidór sira ne’e,” Diretór tenik.
Enkuantu, TradeInvest mós realiza ona fórum negósiu ne’e dala-rua iha nasaun rua (Singapura no Cambódia), iha ámbitu vizita Prezidente Repúblika, José Ramos Horta. Tanba TradeInvest konsidera Ramos Horta nu’udar figura mundiál, entaun aproveita oportunidade ne’e realiza fórum, rezultadu iha tanba iha investidór sira partisipa barak iha eventu internasionál ne’e.
“Kada vizita Prezidente Repúblika, José Ramos Horta nian maski atu halo promosaun negósiu ba investidór sira ne’e kompeténsia Governu nian, maibé ami aproveita figura diplomásia Prezidente nian, ne’ebé kada vizita Estadu ami realiza fórum negósiu iha rai ne’ebé Prezidente vizita. Ami realiza dala-rua ona iha Singapura no Cambódia, iha ne’e bainhira ami publika liuhosi portál katak Timor-Leste realiza fórum negósiu no tau Prezidente Horta nia naran, semana ida de’it ema marka ajenda atu partisipa barak,” nia salienta.
Tanba ne’e, Diretór konsidera tenke aproveita rekursu hanesan figura internasionál sira, tanba bainhira iha vizita Estadu ida maka ema boot rai ida hanesan Xefe Estadu bá vizita ne’e simu ho di’ak, konserteza katak investidór sira hakbesik hodi partisipa iha eventu boot sira ne’e.
Antes ne’e, bainhira Ramos Horta seidauk sai Prezidente Repúblika, TradeInvest lori nia ba Singapura partisipa iha fórum negósiu sira, ne’ebé hosi atividade ne’e maka lori rezultadu investimentu Marina Square ne’ebé tinan liubá halo ona lansamentu projetu konstrusaun.
Jornalista : Antónia Gusmão
Editora : Julia Chatarina
