DILI, 28 setembru 2023 (TATOLI)—Prezidente Parlamentu Nasionál, Maria Fernanda Lay, husu Ministéru Saúde (MS) atu rezolve probelma aimoruk stock out iha fasilidade saúde sira iha territóriu nasionál.
Notísia Relevante: Membru PN husu MS rezolve lalais problema aimoruk “stock out”
“Ha’u mós preokupa, maibé sé mak halo papel, ne’e ministériu saúde,” Prezidente PN ne’e hateten ba Agência Tatoli iha uma fukun PN, sesta ne’e.
Tanba ne’e, líder segundu órgaun soberania ne’e bolu atensaun ba MS atu tau atensaun tanba povu moras ba tratamentu iha ospitál ne’e aimoruk prinsipál balun laiha.
Nia mós husu ba komisaun F trata asuntu Saúde, Seguransa, Sosiál no Igualidade Jéneru iha PN atu haree kestaun aimoruk stock out.
Deputada membru komisaun F, Maria Teresa Gusmão, mós husu MS tau atensaun rezolve lala’is problema aimoruk stock out iha ospitál sira.
“Loos, problema aimoruk aimoruk stock out, ita-nia pasiente sira kontinua hasoru. Fulan rua ba kotuk, ami komisaun F (trata asuntu Saúde) hala’o fiskalizasaun ba SAMES no ospitál Nasionál Guido Valadares rasik, nune’e Komisaun rasik bolu ona Ministra Saúde no ninia rezultadu foin daudaun iha debate programa IX Governu ho orsamentu retifikativu ba 2023 haree katak, ministéru aumenta ona orsamentu atu responde ba preokupasaun sira-ne’e. Nune’e, hein bele responde lala’is tanba orsamentu retifikativu promulga ona,” nia hateten.
Tuir niia, fiskalizasaun ne’ebé hala’o identifika problema stoke out ne’e kontinua mosu tamba orsamentu ladun sufisiente aloka ba ida-ne’e, situasaun COVID-19, funu Rúsia ho Ukránia halo mundu tomak sofre impaktu, ne’eduni prosesu administrasaun no mós birokrásia prosesu aprovizionamentu.
Nune’e, ba oin labele akontese tan problema sira-ne’e mak presiza hadi’a burokrásia ho sistema nune’e atu sosa aimoruk haree ninia prazu naruk no sosa durasaun ba tinan rua liu, no nia prazu mós liu hanesan tuir konkursu ne’ebé atu kompra medikamentu.
“Tanba ne’e, mekanizmu atu labele kontinua akontese tan situasaun sira-ne’e mak prevee orsamentu adekuadu ba aimoruk no ninia ekipamentu hotu no hadi’a sistema,” nia dehan.
Jornalista : Nelson de Sousa
Editór : Cancio Ximenes
