OÉ-CUSSE 02 outubru 2023 (TATOLI – Estudante 3.332 mai hosi ensinu báziku, ensinu sekundáriu jerál no tékniku vokasionál iha Rejiaun Administrativa Espesiál Oé-Cusse Ambeno (RAEOA) sai kandidatu atu partisipa iha ezame nasionála tinan 2023 ne’e.
Notísia relevante: Dulce de Jesus sei garante kualidade ezame nasionál ba alunu sira
Diretór Edukasaun Oé-Cusse, Daniel Mauno, informa, hosi 3.332 ne’e ensinu báziku iha 1.711, ensinu sekundáriu jerál iha estudante 1.172, ba ensinu tékniku vikasionál iha estudante 449.
Tuir nia, sentru ba realizasaun ezame ba ensinu báziku ne’e lokalidade iha fatin 21, hosi ensinu sekundáriu jerál iha fatin hitu (7), no tékniku vokasionál iha fatin haat (4) ne’ebé hamutuk fatin 32.
“Kona-bá atualizasaun dadús to’o ohin, ita haree katak seidauk iha mudánsa hosi eskola, signifika dadús ne’ebé hatama ona iha ne’e nafatin 3.332, hein katak to’o loron 16 outubru hot-hotu partisipa iha ezame nasionál,” nia dehan ba jornalista sira iha Oé-Cusse, segunda ne’e.
Nia informa, ba ezame pasajén de klase, sei realiza depois ezame nasionál bazea tuir nivél ensinu ida-idak, hanean ensinu báziku tuir siklu ida-idak, hanesan mós ho ensinu sekundáriu no tékniku vokasionál.
“Kona-ba kalendáriu iha loron 13, pontu ezame sira sei to’o Oé-Cusse, no loron 14 to’o 16 hahú distribui ba eskola ida-idak, nune’e loron 16 ezame nasionál komesa la’o,” nia katak.
Nia dehan ezame sei hala’o durante loron haat, tanba envolve mós ho lingua tetum, bainhira remata lori kedan ba Ministériu atu halo koresaun hanesan tinan-tinan, no ba profesór vizilansia, ne’e preparadu tiha ona, desizaun ona ona deside liuhosi enkontru jerál iha semana kotuk,
Notísia relevante: Alunu rihun 56-resin realiza ezame nasionál iha outubru
Jornalista: Abílio Elo Nini
Editór: Evaristo Soares Martins
