DILI, 13 novembru 2023 (TATOLI)—Kandidatu Xefe Suku, João Mesquita Soares eleitu ona hanesan Xefe Suku Balibar hafoin halakon kandidatura seluk, Gil Yanes da Silva Sores iha eleisaun suku segundu volta.
João Mesquita Soares promete sei garante estabilidade iha suku Balibar, no sei esforsu hala’o desenvolvimentu ba suku laran liu-liu hatan ba difikuldade komunidade nian ba estrada no be’e mos.
“Ha’u mai ho hanoin konstritivu no inovativu hodi garante estabilidade no lori desenvolvimentu suku ba oin. Hanesan iha ne’e difikuldade barak mak ita hasoru mak be’e mos no estrada balun seidauk lao ho diak iha kada aldeia no ida ne’e mak motiva ha’u hodi kandidata a’an,” João Sores dehan ba jornalista sira iha Sentru Votasaun Aldeia Lacoto Balibar, segunda ne’e.
Xefe Suku Eleitu ne’e mai ho vizaun ba komunidade suku Balibar mak respeitu ema seluk no simu ideia konstritivu sira nune’e bele hamutuk desenvolve suku.
Antes ne’e iha kandidatura nain neen (6) mak kompete iha loron 28 outubru 2023 maibe hafoin eleisaun konsege lori kandidatura nain rua hodi kontinua kompete iha eleisaun segundu volta mak Gil Yanes da Silva Sores no João Mesquita Soares.
Kandidatu Xefe Suku Balibar ne’ebé la konsege eleitu, Gil Yanes da Silva Sores hatete prontu simu dezisaun husi povu nian no prontu servisu hamutuk ho Xefe Suku Eleitu hodi kria paz no dame iha suku laran.
“Bainhira lakon mos ha’u sei nafatin apoiu Xefe suku tanba hau nia vizaun rasik hodi kria paz ba iha suku ida ne’e,” nia esplika.
Balibar hanesan suku ne’ebe lokaliza iha postu administrativu Cristo Rei, munisípiu Dili, kompostu hudi aldeia ha’at mak hanesan Fatu Loda, Lacoto, Lorico no Tancae.
João Mesquita Soares eleitu ba Xefe Suku Balibar ho votus 429, hafoin Gil Yanes da Silva Sores hetan deit votu 304, husi total votante 778.
Elisaun iha Suku Balibar hetan seguransa masimu hosi Komandu PNTL no hetan observasaun direita hosi ekipa observador CNE.
Jornalista : Cidalia Fátima
Editora : Armandina Moniz
