DILI, 23 novembru 2023 (TATOLI)—Xefe bankada PLP iha Parlamentu Nasionál (PN), Deputada Maria Angelina Sarmento, dúvida ho desizaun Vise Primeiru-Ministru no Ministru Koordenadór asuntu Ekonómika no Ministru Turizmu Ambiente, ne’ebé notifika dirijente no funsionáriu Institutu Públiku (IP) ho Empreza Públika (EP) atu konklui kontratu iha 31 dezembru 2023.
Notísia Relevante: Ministru Kalbuadi husu funsionáriu hotu atu labele laran taridu
Tuir nia, Governu ida-idak lidera no jere instituisaun, nune’e karik desizaun polítika ida-ne’e reflete ba programa IX Governu nian ne’ebé reitera klaramente katak IX Governu iha planu estingi hotu Institutu Públiku ho Empreza Públika ida rua, ho razaun ida katak IP no EP sira fó todan ba Orsamentu Estadu Jerál Estadu,
Dalaruma planu programa Governu nian sira ezekuta ona iha dezembru agora, atu hapara hotu kontratu ba IP no EP sira-nia funsionáriu no ajente administrasaun públika.
“Ami hare, ha’u seidauk pronúnsia iha ne’e maibé se ida ne’e realiza duni, ami dúvida tebes ba Governu ninia polítika atu buka reseita alternativa no arekada reseita doméstika, no hasa’e reseita doméstika. Tanba EP mós iha reseita propria ne’ebé mai hosi sira buka orsamentu rasik no sira halo atividade ekonómika sira-ne’ebé fó fali reseita foun,” nia hateten ba jornalista sira iha uma fukun PN, sesta ne’e.
Se hapara hotu kontratu funsionáriu sira iha IP no EP ne’e lori dúvida mai atu kestiona seraké polítika atu buka reseita alternativu hodi hasa’e reseita doméstika sei alkansa ka lae Governu nian.
Ho preokupasaun Deputadu opozisaun ne’e, jornalista Tatoli konfirma ho Vise Prezidente Bankada CNRT iha PN, Deputadu Patrocínio Fernandes, maibé lakohi fó komentáriu tanba ladun hatene informasaun refere.
Vise Primeiru-Ministru no Ministru Koordenadór Asuntu Ekónomiku no Ministru Turizmu Ambiente, Francisco Kalbuadi Lay, husu ba funsionáriu sira atu labele laran taridu tanba karta sirkulár ne’ebé fó la’ós ba funsionáriu Empreza Públika (EP) no Institutu Públiku (IP) hotu maibé ida-ne’ebé tutela ba nia.
“Karta ha’u hasai duni maibé la ba EP no IP hotu, maibé ba EP no IP sira iha ministériu ne’ebé ha’u nian. Husu labele laran taridu,” Kalbuadi hateten ba jornalista sira iha Bebora, sesta ne’e.
Tanba ne’e, ministru husu ba funsionáriu EP no IP hotu labele laran susar tanba Governu sei la hapara funsionáriu sira.
Nota ofisiál ne’ebé fó sai hosi Vise-Primeiru Ministru no Ministru Koordenadór ba Asuntu Ekonómiku no Ministru Turizmu no Ambiente, notifika ba dirijente másimu hosi IP ho EP katak konsidera ba Dekretu-Lei nú 46/2023, 28 jullu ne’ebé estabelese Lei Orgánika ba IX Governu Konstitusionál, hosi artigu 2 no 3, mak solisita ba dirijente sira EP no IP nian atu notifika funsionáriu sira ho kontratadu termu sertu atu konklui kontratu iha 31 dezembru 2023 no laiha ona renovasaun ba kontratu.
Karta ne’e fó sai iha 17 novembru 2023 ho númeru 061/VPM-MCAE/MTA/XI/2023, asina direta hosi Vise Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente.
Jornalista : Nelson de Sousa
Editór : Cancio Ximenes
