DILI, 01 dezembru 2023 (TATOLI) – Diretór Ezektuviu Asosiasaun Defisiénsia Timor-Leste (ADTL), Cesário da Silva, husu ba instituisaun Estadu no privadu sira atu garante asesibilidade ba ema ho defisiénsia liuliu infraestrutura fízika, tanba kontinua sai bareira boot ba ema ho defisiénsia sira atu asesu.
“Atu atinje inkluzaun defisiénsia di’ak liu presiza asaun úniku husi ita hotu-hotu atu garante ema ho defisiénsia asesu ba iha setór hotu iha prosesu dezenvolvimentu nasionál. Problema bo’ot mak laiha infraestrutura fízika ne’ebé asesivél ba ema ho defisiénsia sira”, Diretór Ezektuviu ADTL ne’e preokupa iha Caicoli-Dili.
Diretór Ezekutivu ADTL ne’e hato’o kestaun ne’e relasiona ho loron Internasionál ema ho defiénsia ho tema “Unidu iha Asaun hodi salva no alkansa objetivu dezenvolvimentu sustentável ba, ho no husi ema ho defisiénsia”.
Durante ne’e, nia dehan ema ho defisiénsia seidauk asesu infraestrutura bázika ne’ebé adekuada atu sira bele hetan asesibilidade hanesan eskola, saúde no edifísiu públiku sira seluk.
“Ha’u preokupa liután mak kondisaun eskola la permite atu ema ho defisiénsia asesu ba eskola no manorin sira laiha espesialidade atu hanorin ema ho defiénsia matan no tilun. Ha’u fó ezemplu katak ema ho defisiénsia kuandu hakarak ba haris fatin, kontinua presiza ema hodi dudu ho kadeira roda ba iha haris fatin”, nia preokupa.
Nia afirma: “Ha’u sujere ba ba Governu atubele kria kompromisu no polítika hodi forma rekursu umanu atu implementa planu asaun nasionál ne’ebé Timor-Leste iha,” nia sujere.
Timor-Leste ratifika ona Konvensaun Organizasaun Nasaun Unida konaba direitu ema ho defisénsia ne’e signifika tebes ba mundu, maibé Timor-Leste presiza kompleta mós ho nia asaun konkreta ba asuntu ida ne’e.
Ema ho defisiénsia, inklui ema sira ne’ebé iha defisiénsia fíziku, mentál, intelektuál ka sensoriál ne’ebé iha interasaun ho barreira oioin (Nasaun Unida nia Konvensaun kona-ba Direitu Ema ho Defisiénsia eh NUKDED/UNCRPD; artigu 1).
“Ita halo monitorizasaun implementasaun Planu Asaun Nasionál (PAN) ne’e tenke iha asesibilidade ba ema ho defisiénsia sira. Tanba ne’e mak ita husu ba instituisaun hotu-hotu hanesan governu tenke halo asesibilidade”, katak.
Durante ne’e dezenvolvimentu nasionál liga ho asesibilidade fíziku ladún fó fatin ba ema ho defisiénsia tanba bainhira ema ho defisiénsia asesu ka partisipa ba semináriu ruma, labele, tanba kauza hosi kondisaun no ambiente ne’ebé la fó espasu ba ema ho defisiénsia sira”, Diretór ne’e lamenta.
Iha Konstituisaun Repúblika Demokrátika Timor-Leste (RDTL) deskreve katak Sidadaun defisiente sira iha direitu ne’ebé hanesan no sai sujeitu ba kna’ar husi sidadaun sira seluk nian, no la iha sidadaun ida mak bele hetan diskriminasaun kontra ho razaun kondisaun fízika ka mentál, tuir fornese ona iha parágrafu 1 husi artigu 21, no parágrafu 2 artigu 16 nian.
Nune’e mós, tuir meta ODS (Objetivu Dezenvolvimentu Sustentável), ONU, ne’ebé nasaun barak adota inklui Timor-Leste (TL), iha pontu 17 hanesan elimina ki’ak, eradika hamlaha, saúde no bem estar, edukasaun ho kualidade igualidade jéneru, bee moos no saneamentu.
Depois, traballu dignu no kreximentu ekonómiku, indústria, inovasaun no infraestrutura, redúz dezigualidade, sidade no komunidade sustentável, produsaun no konsumu sustentável, asaun klimátika, proteje vida maritíma, proteje vida rai-leten, pás, justisa no instituisaun efikaz, parseiru ba objetivu sira ne’e inklui mós enerjia moos no asesível (meta 7).
Relatóriu PANED 2014-2018
Tuir relatóriu, Planu Asaun Nasionál ba Ema ho Defisiénsia (PANED) iha tinan 2014-2018), iha Vizaun-jerál: Defisiénsia iha Timor-Leste, ne’ebé elabora bazea ba dadus publikadu husi Diretória Nasionál Estatístika Ministériu Finansa nian hatudu katak ema 48.243 ne’ebé hela iha Timór iha tipu defisiênsia nian balun. Ida ne’e husi totál ida husi ema 1.066.409 eh besik 4.6% husi populasaun.
Katak, ema ho defisiénsia fízika hamutuk 20 593, ema ho defisiénsia matan (29 488), ema ho defisiénsia tilun (17 692), ema ho defisiénsia intelektuál no saúde mentál ( 13 308). Husi totál ne’e, 53% mane no 47% feto. Depois, 10.52 % iha otas entre tinan 0-19 no defisiénsia sai hetok komún iha área rurál sira.
Tuirmai, kona-ba situasaun ba ema ho defisiénsia iha relatóriu ODS, Organizasaun Nasaun Unida nian (ONU), iha Sensus 2015 deskobre katak menus husi métade (44%) husi foinsa’e sira ho idade 15-24 mak hanesan defisiente ne’ebé eskola tiha ona. Ida ne’e métade taxa (87%) husi sira-nia maluk ne’ebé la ho defisiénsia.
Monografu Edukasaun nian hatudu katak foinsa’e sira ne’ebé ho defisiénsia ne’ebé mak tama tiha ona eskola iha porsentu boot liu mak dropout (sai) duke sira-nia eskola maluk: 2/3 (66%) mak la kontinua sira-nia edukasaun sekundária, kompara ba métade (51%) husi foinsa’e sira ne’ebé la’ós defisiente.
32% husi foinsa’e sira ho defisiénsia mak álfabetizadu (edukadu) iha pelumenus iha língua prinsipál haat sira iha Timor-Leste (Tetun, Indonézia, Portugés, ka Inglés) versus 84% husi foinsa’e sira sein defisiénsia. Foinsa’e feto sira ne’ebé ho defisiénsia mak iha taxa literasia ne’ebé menus liu (27%) duke foinsa’e mane sira ho defisiénsia (36%).
Iha parte seluk, tuir Relatóriu Mundiál kona-ba defisiénsia, 2011, prodúz husi Organizasaun Saúde Mundiál (OMS) no Banku Mundiál (BM), afirma katak besik 15% husi mundu nia populasaun moris ho tipu defisiénsia oioin. Husi númeru ida ne’e bele halo estimasaun katak ema 176.400 mak moris hela ho defisiénsia iha Timor-Leste.
Relasiona fila fali ba relatóriu Planu Asaun Nasionál ba Ema ho Defisiénsia (2014-2018) totál persentajen husi kauza defisiénsia ne’e katak kauza husi tinan (37,2%), sira seluk (24,3%), konjenitál eh defisiénsia mai husi jerasaun (12,3%), moras tempu naruk (11,0%), moras tempu badak (9,2%), konflitu (1,9%), asidente veikúlu automotor nian sira (1,1%) no asidente iha serbisu fatin (3,0%).
Notísia relevante: ADTL husu mellora implementasaun inkluzaun ba dezenvolvimentu iha Timor-Leste
Jornalista: Jesuína Xavier
Editór : Florencio Miranda Ximenes
