COVALIMA, 04 dezembru 2023 (TATOLI) – Entre fulan-abríl no novembru, Programa Merenda Eskolár iha Covalima ezekuta ona $973.367,94 husi totál orsamentu alokadu hamutuk millaun $1,2.
“Saldo iha konta bankária hamutuk $167.113,65. Programa Merenda Eskolár nia finansiamentu husi Orsamentu Jerál Estadu tinan 2023 iha kategoria tranferénsia Públika”, Koordenadór Programa Merenda Eskolár Covalima, Francisco Cardoso, hatete iha Santa Rosa, ohin.
Merenda eskolár iha Covalima ne’e implementa iha eskola hamutuk 135. Husi númeru ne’e eskola bázika sentrál 94 ne’ebé fahe ba eskola públika 83 no eskola privada 11. Pré-eskolár iha 41 ne’ebé fahe ba pré-eskolár públiku-33 no privada ualu.
Estudante benefisiáriu ba programa ne’e hamutuk 17.482, husi númeru ne’e ensinu báziku iha 15.806 no pré-eskolár hamutuk 1.622.
Orsamentu ba merenda eskolár ezekuta husi Ekipa Jestaun Programa (EJP) ne’ebé Servisu Edukasaun Munisípiu Covalima kria ona hamutuk 23 iha postu administrativu hitu hanesan iha Fatululik Kria ida, Fatumea rua, Fohorem tolu, Maucatar tolu, Zumalai neen, Suai neen no Tilomar rua.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen.
Notísia relevante:Merenda eskolár iha EBC Ogues ho alimentasaun la saudavel
Jornalista: Celestina Teles
Editora: Maria Auxiliadora
