BAUCAU, 05 marsu 2024 (TATOLI) – Situasaun klima hanesan udan ladún di’ak fó impaktu hodi hamenus rendimentu agrikultór tanba afeita ba produsaun batar iha suku Samalari.
Xefe suku Samalari, postu administrativu Baucau vila, Rui Sertório Magno Sequeira, esplika, mudansa klimátika afeta ba produsaun hahan hanesan batar.
“Ita hetan dezastre oituan tanba udan ho volume kiik halo batar ne’ebé kuda labele hetan rezultadu ho di’ak tanba mudansa klimátika,” Xefe suku Samalari hateten iha Vila Antiga, tersa ne’e.
Situsaun refere fahe ba área rua hanesan iha foho sei iha netik produsaun, enkuantu hosi área tetuk mak afeta maka’as ba udan iha époka tinan-ne’e.
Área rua ne’ebé impkatu maka’as hosi menus produsaun mak hanesan aldeia Festau no Samalari, enkuantu iha área foho hanesan aldeia Sorulai no Osoluga bele dehan sei iha produsaun natoon hodi moris.
“Povu simples moris ho vontade ne’ebé sira iha maibé haka’as-aan nafatin halo vida moris maibé natureza la permite,” Rui Sequeira akresenta.
Maske ne’e komunidade Samalari kontinua halo atividade nu’udar ema agrikultór liuhosi maneira kuda bee-matan liuhosi programa PERMATIL hanesan parte rezervatóriu.
Alende ne’e, autoridade suku hato’o ona situsaun refere ba instituisaun relevante hanesan diresaun serbisu munisipál agrikultura atu tau matan maibé ajuda mak fini, enkuantu produtividade sei bazea ba situasaun udan.
Suku Samalari hamutuk aldeia haat kompostu hosi Solurai, Festau, Samalari no Ossoluga ho totál populasaun 3.187 hosi uma-kain 681.
Jornalista : Natalino Belo
Editór : Evaristo Soares Martins
