JUSTISA, HEADLINE

Tribunál seidauk deside haruka fila Fuzitivu Arnolfo Teves Jr ba Filipina

Tribunál seidauk deside haruka fila Fuzitivu Arnolfo Teves Jr ba Filipina

Arnolfo Teves Jr, tuir hela prosesu audisaun iha Supremu Tribunál Justisa iha tersa ( 21/5) ohin. Foto Natalino Costa.

DILI, 21 maiu 2024 (TATOLI) – Supremu Tribunál Justisa (STJ) liuhosi Juiza Jacinta Correia ne’ebé ka’er kazu Fuzitivu Arnolfo Teves Jr, seidauk bele foti desizaun hodi halo estradisaun ba fuzitivu refere hodi haruka fila ba nia nasaun orijen Filipina, tanba Tribunál hakarak rona pozisaun fuzitivu nian no haree ba faktu sira tuir konstituisaun no lei kooperasaun internasionál no matéria penal molok halo desizaun.

Iha tersa-feira (21/5) tuku 14:00 loraik, ekipa konjunta kompostu hosi Departamentu Investigasaun Kriminál, Departamentu Informasaun Kriminál, Departamentu Informasaun Polísia, Unidade Falintil hamutuk ho guarda prizionál Becora ezekuta ordem hosi Supremu Tribunál Justisa hodi lori fuzitivu iha prizaun Becora atu submete ba prosesu audisaun.

Razaun Supremu Tribunál Justisa halo prosesu audisaun ba fuzitivu Arnolfo Teves tanba tuir lei númeru 15/2011 kona-ba Kooperasaun Internasionál Matéria Penál atu aplika estradisaun ba sidadaun estrajeiru ida tenke kumpre faze rua ida mak prosesu administrativu no faze seluk mak prosesu judisiál.

Tuir nia, bainhira faze administrativu, karik Governu deside la admite ou lakonkorda pedidu formál estradisaun ninian, entaun prosesu ne’e bele nulu. Maibé kuandu Governu dehan katak konkorda ho desizaun pedidu formál hosi Estadu rekrente ninian, maka prosesu ne’e tenke mai Supremu Tribunál Justisa nian.

Kazu Arnolfo Teves, Governu deklara ona hodi halo estradisaun ba sidadaun Filipino ne’e hodi haruka fila ba nia nasaun orijen, maibé atu to’o ba faze ne’e, Supremu Trinunal mak deside tuir prosesu judisiál molok haruka Arnolfo Teves Jr ba Filipina.

Defeza hosi Fuzitivu Arnolfo Teves Jr, Advogadu Privadu, José Ximenes, hateten kliente Arnolfo Teves Jr, mai iha Supremu Tribunál Justisa mak atu rona nia pozisaun molok halo desizaun estradisaun ka haruka nia fila ba nia nasaun orijen.

Tuir lei númeru 15/2011 kona-ba Kooperasaun Internasionál Matéria Penál atu aplika estradisaun ba ema ida hodi haruka fila ema ne’e ba nia nasaun orijen tenke liuhosi prosesu rua ida mak prosesu administrativa no prosesu judisiáriu.

Nia esplika, prosesu Administrativuivu, Governu deside hodi halo estradisaun ba Arnolfo Teves Jr. Maibé atu halo estradisaun ida-ne’e tenke liuhosi faze judisiál, mak rona Arnolfo Teves Jr molok Tribunál foti desizaun ba ida-ne’e.

Advogadu Privadu ne’e dehan, Supremu Tribunál Justisa liuhosi Juiz ne’ebé ka’er kazu ba fuzitivu seidauk bele halo desizaun hodi deside katak atu haruka Arnolfo Teves Jr ba nia nasaun orijen ka lae tanba sei haree no tetu molok foti desizaun halo estradisaun nia kliente Arnolfo.

“Ohin Supremu Tribunál Justisa seidauk halo desizaun ruma ba ida-ne’e, Tribunál só halo audisaun de’it  hodi rona nia (Arnolfo) konkorda atu fila ka la fila ida-ne’e ne’e de’it, ba ida-ne’e ita sei iha faze tuir mai no faze tuir mai, ami sei hato’o ami nia pozisaun kona-ba ida-ne’e”, nia informa.

José Ximenes hateten, estadisaun ba Arnolfo Teves Jr, Supremu Tribunál tenke tetu didi’ak ba deklarasaun fuzitivu ho baze legál sira ne’ebé Timor-Leste iha. hanesan Timor-Leste lakoñese pena de morte, nein prizaun perpetua no Konstituisaun RDTL artigu 35 klaru katak Timor-Leste laiha pena de morte.

“Ita mós iha 2003 ita ratifika konvesaun internasionál kona-ba pengapusan pidana mati, ne’e atu dehan saida, signifika katak sé ita la aplika pena de morte, depois ita estradita ema ne’e ba fali pais orjien para aplika pena de morte ne’e interogatóriu ida ke ita presiza haree”, nia adianta.

“Kestaun seluk nee’bé ha’u hakarak adianta iha ne’e katak seidauk to’o tinan 10, iha tinan hira liu ba iha Filipina sira aplika extra judisial killing la liuhosi prosesu judisiál sira oho de’it ema ba kazu espesífiku ba droga sira”, nia  afirma.

José Ximenes hateten, iha prosesu audisaun ne’e hanesan Defeza hosi Arnolfo Teves, hato’o ona pedidu Supremu Tribunál Justisa atu hatún medidia koasaun ba nia kliente.

“Ami mós ohin hato’o pedidu ida ba Supremu Tribunal Justisa atu konsidera, ami-nia pedidu ne’e mak husu Tribunál atu hatún medida koasaun ba ami-nia kliente. Sé agora daudaun nia kumpre Prizaun Prevetiva, entaun Tribunál bele konsidera hatún medida koasaun ne’e ba Aprezentasaun Periódika. Ami hato’o ona iha ami-nia pedidu hein de’it, Juiz Titulár ne’ebé kaer prosesu ba ami-nia kliente ne’e konforme nia haree no deside”, nia konklui.

Prosesu audisaun ne’e prezide hosi Juiza singulár Jacinta Correia, Ministériu Públiku reprezenta hosi Prokuradór Jacinto Babo no Arguidu hetan asisténsia legál hosi Advogadu Privadu nain tolu.

Notísia relevante : Governu deside haruka fila Fuzitivu Arnolfo Teves Jr ba Filipina

Arnolf Teves hakerek karta iha prizaun husu Governu salva ninia vida

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!