DILI, 28 Junu 2024 (TATOLI)–Ministériu Edukasaun liuhosi Diresaun Nasionál Ensiñu Sekundáriu iha semana kotuk asina ona karta aprovasaun ho Diretór Eskola Ensiñu Sekundáriu sira hodi transfere orsamentu konsensaun eskolár ba konta bankária kada estabelesimentu ensinu eskolár.
Diretór Nasionál Ensinu Sekundáriu Jerál, Benjamin Fernandes, relata hafoin asina karta aprovasaun ne’e, Ministériu Finansa sei fasilita eskola idaidak hodi loke sira-nia konta bankaria nune’e ministériu bele halo tranferénsia orsamentu direta ba konta eskola idaidak nian.
“Ohin ami bolu Diretór eskola sekundáriu sira, ne’ebé ohin mai asina ona espesimen[aprovasaun ], nune’e hodi loke konta bankária kada eskola nian. Tanbasá mak sira tenke loke konta bankária, tanba ita-nia orsamentu agora iha transferénsia públiku nian entaun tenke transfer direita ba kada eskola iha semana dahuluk Fulan-Jullu ne’e”, Nia dehan ba TATOLI, iha ninia servisu fatin Vila-Verde, Dili, sesta ne’e.
Ministériu Edukasaun aloka orsamentu konsensaun eskolár ne’e atu fasilita eskola sira hodi prodúz matéria ezame trimestre daruak nian ne’ebé sei realiza iha fulan-jullu ne’e. Antes ne’e, orsamentu konsensaun eskolár ne’e transfere ba Edukasaun Munisípiu depois munisípiu aloka ba eskola idaidak.
“Diretór eskola sira iha alternativu ka meiu saida mak bele solusiona asuntu osan konsensaun eskolár ne’e, maibé ha’u atu dehan to’o agora seidauk kestiona ba ami kona-ba konsensaun eskolár. Ami iha WhatsApp grupu entre Diretór sira,” nia dehan.
Nia hatutan Eskola Sekundáriu Jerál no Tékniku Vokasionál maka oras ne’e loke konta sira-nia konta bankária, enkuantu ensinu bázika no pre-eskolár sira ninia konta bankaria loke ona antes ne’e.
“Ensinu báziku nian tama mak sedu tanba sira nian uluk kedas iha konta bankária nune’e ita transfere de’it, ne’ebé di’ak hela ita só hein de’it mak konta bankária sekundáriu nian. Ami rekoñese tarde maibé nia prosesu mak la’o hanesan ne’e,” nia dehan.
Diretór Eskola Ensinu Sekundáriu Jerál (ESJ) Fitun Naroman Timor-Lorosa’e (Finantil) iha Comoro, Aniceto Barlelo, hateten prosesu transferénsia orsamentu tarde sei difikulta preparasaun matéria ezame trimestre daruak nian.
“Ami ba enkontru ona, katak tempu badak osan konsensaun eskolár ne’e tama ona ba bankária kada eskola nian, maibé depois enkontru to’o agora osan seidauk tama, neʼebé kuandu orsamentu ne’e tarde signifika difikulta tan ona ezame, Ministériu Edukasaun (ME) bandu ona labele husu kontribuisaun ba estudante inklui nia inan-aman sira,” Diretór Eskola hateten.
Tuir dadus totál eskola sekundáriu jerál iha territóriu hamutuk 54 no tékniku vokasionál 51.
Jornalista: Osória Marques
Editór : Agapito dos Santos
