DILI, 17 jullu 2024 (TATOLI)–Diretór Servisu Munisipál Jestaun Merkadu no Turizmu iha Autoridade Munisipiu Dili (AMD), Arthur Henriques, hateten Governu liuhusi Jestaun Merkadu no Turizmu sei muda negosiante sira faan sasán iha rotunda Comoro no Pantai Kelapa ba iha merkadu Maneleuana iha fulan-agostu.
“Negosiante sira faan iha rotunda Comoro ne’e, sira-ne’ebé uluk sai husi merkadu Manleuana. Sira-ne’ebé faan manu lokál no roupa obralan iha IOB Pantai Kelapa ne’e mós, ami sei muda iha agostu ne’e,” Diretór Servisu Munisipal Jestaun Merkadu no Turizmu, Arthur Henriques, hateten ba Agência Tatoli, iha Caicoli, kuarta ne’e.
Diretór ne’e dehan, muda negosiante sira-ne’e ba Manleuana tanba atu bele normaliza movimenteu engarrafamentu, nune’e ema bele haree paizajen ida di’ak iha estrada públiku.
Jestaun Merkadu AMD nian identifika ona vendedór sira hamutuk 127 ne’ebé faan atualmente iha rotunda Comoro, maibé iha aumentu vendedór ambulante iha ne’eba.
“Iha 2023 ne’e, ami foti dadus mak ne’e maibé agora tuir ami-nia observasaun negosiante aumenta,” nia dehan.
AMD identifika mós negosiante sira faan manu lokál iha Pantai Kelapa ne’e hamutuk na’in-20. .
Kondisaun fatin faan iha merkadu Manleuana ne’ebé la sufisiente ba negosiante sira, diretór ne’e hatán, negosiante sira tenke muda provizoriamente ba iha merkadu Manleuana hodi hein estensaun merkadu refere.
Jornalista : Jesuína Xavier
Editór : Cancio Ximenes
