JAKARTA, 06 setembru 2024 (TATOLI) – Autoridade Indonézia halo apriensaun ba ema na’in hitu tanba lansa ameasa liuhusi virtuál ka ‘online’ hasoru Papa Francisco durante ninia vizita iha Indonézia.
Tuir informasaun fó sai husi Polisi Republik Indonesia (POLRI) katak autor hirak ne’e hetan apriensaun iha área Jakarta, Provinsia Sumatra Oeste, no Bangka Belintung.
Tuir Porta Voz Unidade Espesiál Indonézia Kontra Terorista, ka Densus 88, Aswin Siregar, katak autoridade halo apriensaun ba autór hirak ne’e tanba lansa deklarasaun no imajen online, fó ameasa atake bomba hasoru Papa Francisco ninia enkontru sira.
Siregar hato’o ninia konfirmasaun, tuir TEMPO.CO, TATOLI sita katak ema sira ne’e loos duni envolve iha lansamentu ameasa atake bomba online hasoru Santu Padre. “Sim, ne’e los duni,” Portavoz ne’e hato’o iha sesta ne’e.
Individuál ho inisial HFP, LB, DF, FA, HS, ER, and RS oras ne’e daudaun detein hela iha sala investigasaun POLRI nian hodi prosea tuir dalan legál.
Siregar dehan, tanba ne’e, Densus 88 foti asaun legál hasoru individu hirak ne’e tanba halo propaganda no atake terror liuhusi media sosiál hasoru Santu Padre.
Nia relata katak iha mós ameasa atu kria inséndiu iha fatin hirak ne’ebé Papa marka prezensa durante ninia vizita.
Ameasa online ne’e fó hanoin hikas ba públiku akontesimenu atake terrorista iha 2002, ka Bali Bombings ne’ebé rezulta ema nain-202 lakon vida.
Iha indonézia, parte seguransa taka hotu Estrada públiku ne’ebe iha ligasaun direta ho fatin hirak ne’ebé mak Santu Padre vizita.
Entretantu, iha sesta, tuku 7.08 kalan, Santu Padre sama-ain iha Areportu Internasional Port Moresby, Papua Nova Guine hodi kontinua ninia viajen apostólika durante loron tolu iha nasaun Oseania ne’e.
Jornalista: Filomeno Martins
Editór: Rafael Ximenes de A. Belo
