DILI, 20 setembru 2024 (TATOLI)—Governu liuhusi reuniaun Konsellu Ministru (KM) estraordinária, sesta ne’e, aprova projetu rezolusaun Governu, ne’ebé aprezenta husi Ministru Petróleu no Rekursu Minerál, Francisco da Costa Monteiro, kona-ba akizisaun interese partisipativu iha Kontratu Fahe Produsaun PSC-TL-SO-T 19- 12 no PSC -TL-SO-T 19-13 iha kampu petrolíferu, Bayu-Undan.
Ho desizaun ida-ne’e, Timor Gás no Petróleu, Empreza Públika (Timor GAP, E.P) ne’ebé nu’udar entidade públika ne’ebé responsável ba jestaun interrese petróleu Estadu nian, sei iha interese partisipativu 16% iha kampu Bayu-Undan, Santos iha 36,5%, SK E&S iha 21%, INPEX iha 9.6%, Eni 9,2% no Tokyo Timor Sea Resources iha 7,6%.
“Entrada Timor GAP, E.P liuhusi subsidiáriu sira iha projetu Bayu-Undan nu’udar oportunidade di’ak ida ba empreza públika ne’ebé iha responsabilidade atu kaer no jere patrimóniu Estadu Timor-Leste nian iha setór petrolíferu hodi reforsa nia koñesimentu tékniku iha projetu produsaun petrolífera no aselera dezenvolvimentu ba ninia rekursu umanu,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : Timor GAP, E.P hetan ona partisipasaun 16% husi projetu Bayu-undan
Tranzasaun ne’e sei hala’o ba valór simbóliku $1 ne’ebé sei selu ba vendedór ida-idak ne’ebé envolve, hanesan prátika komún ida iha operasaun sira ho tipu ida-ne’e, ne’ebé ho objetivu atu fasilita transferénsia interese no direitu partisipativu sira hodi garante kontinuidade operasaun petrolífera nian iha kampu Bayu-Undan.
Kampu Bayu-Undan ne’ebé lokaliza iha tasi-laran Timor-Leste maizumenus kilómetru 500 husi Darwin, hala’o ona operasaun desde tinan 2004, hamosu reseita biliaun $25 ba Timor-Leste.
Projetu ne’e fó ona serbisu ba timoroan hamutuk 350-resin iha onshore no offshore, forsa traballu Santos nian 100% iha Timor-Leste kompostu husi traballadór nasionál sira.
Jornalista : Osória Marques
Editora : Julia Chatarina
