OÉ-CUSSE, 24 Setembru 2024 (TATOLI) – Agrikultór na’in-tolu iha Rejiaun Administrativa Espesiál Oé-Cusse Ambeno (RAEOA) sei submete ba prosesu investigasaun no hetan sansaun tanba prátika sunu rai arbiru no lere to’os iha área tara-bandu nian.
Xefe Departamentu Floresta iha Diresaun Rejionál Agrikultura Oé-Cusse, Marcos Sufa Colo, hateten bainhira sidadaun ruma lere to’os ka sunu rai no tesi ai-arbiru iha área protejida sei hetan sansaun no kontinua prosesa tuir Dekretu-lei númeru 5/2016 kona-ba Sistema Nasionál Área Protejida.
Notísia relevante: RAEOA implementa ona lei sistema nasionál área protejida
Kona-ba área tara-bandu nian sei prosesa tuir regulamentu suku nian, tanba lia-na’in no konsellu suku sira mak kria iha suku laran, maibé kuandu la kumpre mak sei prosesu tuir Dekretu-lei númeru 5/2016 nian.
“Agora, ita rejista kazu tolu, ne’ebé sei submete ba prosesu. Karik la kumpre, ita sei prosesa tuir lei ne’ebé vigora iha ita-nia nasaun”, Marcos Colo dehan ba jornalista iha Oé-Cusse, ohin.
Nia informa katak kazu dahuluk akontese iha semana kotuk bainhira ema deskoñesidu sunu rai haleu foho Oétulu, Pante Makasar nian, no ekipa floresta bá identifika no konsege fó xamada ona. Ema ne’ebé prátika ne’e admite katak nia sunu to’os no depois fila bá uma la konsege hamate, tanba ne’e ahi han rai hodi sirkula tiha foho ne’e.
“Ita sei prosesa tuir kritériu ka sansaun ne’ebé uluk lia-na’in sira hatuur ona iha suku Costa, tanba ne’e tama iha área tara-bandu suku Costa nian”, salienta.
Akontese mós iha sub-rejiaun Nítibe, ne’ebé agrikultór bá lere to’os iha área tara-bandu nia no ekipa floresta bá konfirma ona no halo xamada ba nia no sei kumpre atu fó sansaun tuir kultura suku nian no to’os ne’ebé lere ona sei la kontinua.
“Ita rejista mós iha sub-rejiaun Pássabe lere to’os iha área bee-matan, ne’ebé ita sei fó xamada hodi prosesa. Kona-ba sub-rejiaun Oésilo seidauk rejista”, nia hateten.
Notísia relevante: RAEOA presiza Guarda Floresta 20 hodi monitoriza área protejida
Jornalista: Abílio Elo Nini
Editora: Maria Auxiliadora
