DILI, 27 novembru 2024 (TATOLI)—Prezidente Repúblika (PR) no Laureadu Nobel ba Pás, José Ramos Horta, prezide serimónia istóriku hodi kondekora Kombatente Libertasaun Nasionál no personalidade sira ne’ebé fó ona kontribuisaun esesionál ba libertasaun no dezenvolvimentu Timor-Leste.
Serimónia ne’e iha ámbitu selebrasaun loron Proklamasaun Independénsia ba dala-49 iha loron 28 novembru.
Tuir proposta husi Konsellu Kombatente Libertasaun Nasionál, Prezidente Repúblika fó sai orden nasionál ba Kombatente Libertasaun Nasionál sira iha kategoria tolu, hanesan Orden Guerilla ne’ebé fó ba ema na’in-19, Orden Funu-Na’in ba ema na’in-19 no Orden Nicolau Lobato ba ema hamutuk 4.395
Iha serimónia solene iha Palásiu Prezidensiál Nicolau Lobato, PR Horta fó kondekorasaun ba Kombatente Libertasaun Nasionál hamutuk 107 ho Orden Nicolau Lobato.
Notísia relevante : Deputada Julie Laiskodat sente onradu simu kondekorasaun husi PR Horta
Aleinde ne’e, Xefe Estadu mós nomea ona membru sira husi Konsellu Kombatente Libertasaun Nasionál hodi reprezenta Prezidente iha serimónia kondekorasaun sira iha loron 28 novembru 2024 iha munisípiu Lautém, Viqueque, Baucau, Same Manufahi, Ermera, Bobonaro, Maliana, Liquiçá, no Manatuto.
“Kondekorasaun sira ne’e reprezenta ita-nia nasaun nia gratidaun ne’ebé dura ba sira ne’ebé luta ba ita-nia independénsia. Serimónia ida-ne’e sai hanesan testamentu ida ba ita-nia kompromisu atu fó onra ba mártir sira husi ita-nia luta ba independénsia no atu prezerva legadu husi ita-nia movimentu libertasaun nian ba jerasaun sira iha futuru,” Prezidente Horta, hato’o iha iha Palásiu Prezidensiál.
Iha loron hanesan, iha Palásiu Nobre, Prezidente Ramos Horta kondekora Orden Timor-Leste ba personalidade nasionál no internasionál hamutuk na’in-81, ne’ebé fó ona kontribuisaun esesionál ba Timor-Leste nia dezenvolvimentu, estabilidade, no progresu demokrátiku.
Prezidente fó Orden Timor-Leste iha kategoria Kolár ba ema na’in-ualu, Medalla ba ema na’in-15, Insígnia ba ema na’in-14 no Méritu ba ema na’in-44, inklui sertifikadu rekoñesimentu.
“Ohin, ami rekoñese sira ne’ebé maka serbisu maka’as hodi hametin ami-nia nasaun no haburas pás, demokrasia no dezenvolvimentu iha Timor-Leste. Kondekorasaun hirak ne’e simboliza ami-nia agradesimentu kle’an ba ita-nia sidadaun no belun internasionál sira-ne’ebé maka hamutuk ho ita iha ita-nia jornada dezenvolvimentu nasionál, hodi kontribui sira-nia matenek no dedikasaun tantu iha ita-nia fronteira sira no husi rai-li’ur,” PR Ramos dehan.
Xefe Estadu subliña, importánsia atu rekoñese sira ne’ebé kontribui ba Timor-Leste nia independénsia no dezenvolvimentu ne’ebé la’o hela iha setór oin-oin.
Jornalista : Osória Marques
Editora : Julia Chatarina
