iklan

HEADLINE, OEKUSI

Edukasaun RAEOA konsege utiliza fundu konsesaun eskolár hodi hadi’a eskola sira

Edukasaun RAEOA konsege utiliza fundu konsesaun eskolár hodi hadi’a eskola sira

Diretór Edukasaun Oé-Cusse, Vincencio Cono. Imajen/Abílio Elo Nini

OÉ-CUSSE, 17 Janeiru 2025 (TATOLI) – Diretór Edukasaun Rejiaun Administrativa Espesiál Oé-Cusse Ambeno (RAEOA), Vincencio Cono, informa, alokasaun fundu konsesaun eskolár konsege utiliza hodi rezolve nesesidade eskola sira liuliu, infraestrutura bázika, hanesan haris-fatin, bee-moos no liña elétrisidade no hadi’a eskola.

Hafoin asume kargu nu’udar dirijente edukasaun, deskobre  eskola barak iha territóriu Oé-Cusse balun estragu, hanesan odamatan, janela, haris fatin inklui parede sira nakfera.

Notísia relevante:Eskola 90 iha Oé-Cusse simu osan konsesaun eskolár $132-resin hodi hadi’a fasilidade

“Maibé ita agradese tanba relatóriu ita simu kada eskola iha mudansa. Tanba molok ita tama, ita deskobre tinan hirak liuba kada alunu hetan $1 de’it, maibé hasa’e kada alunu hetan $2 ba eskola públiku de’it, ne’ebé konsege rezolve ona problema lubun ida, hanesan pinta no nahe eskola, hadi’a sala sira, janela ho haris fatin balun, dada ahi, dada bee-moos ba eskola, ida-ne’e mak mudánsa mai husi osan konsesaun eskolár,” nia dehan iha Oé-Cusse, ohin.

Iha 2024, Edukasuan aloka osan $132, 342.00 ba konsesaun eskolár ba alvu ba eskola 90  ho totál estudante hamutuk 21.509.

Husi montante orsamentu ne’e,  kada estudante hetan  $2, mai husi Pré-eskolár 12 ho totál estudante 748, Eskola Ensinu Báziku 72 ho totál estudante 17.425, Eskola Sekundáriu Públiku lima (5) ho totál estudante 2.359 no Eskola Tékniku Vokasionál ida (1) ho totál estudante 977.

“Agora ano letivu foun 2025, ita sei iha levantamentu dadús, tanba osan konsesaun eskolár aloka bazea dadús estudante husi eskola idak-idak,” nia dehan.

Iha fatin seluk, Koordenadór EBF 30 Agostu Masin sub-rejiaun Pante Makasar, Belarmino Beto, dehan, osan ne’ebé simu, ho objetivu atu responde nesesidade eskola.

“Primeiru, ami enkontru ho profesór sira halo planu saida mak atu ezekuta osan ne’e, hodi define item ne’ebé nesesáriu ba eskola presiza, exemplu iha EBF 30 Agostu Masin depois osan ne’ebé foti $3.480,00, jere duni konsege hola sasán eskola liuliu nesesidade profesór sira-nian, hadi’a eskola no pinta halo foun, hadi’a odamatan no janela, hadi’a meja no kadeira, depois taka sala ne’ebé kuak, no sasán eletrika nian,” nia orgullu.

Nune’e, nia konsidera fundu konsesaun ne’e benefisia duni ba eskola nia nesesidade no bainhira iha osan restu hola fali kadernu no lapijeira, hodi fó prémiu ba alunu sira-ne’e prestasaun di’ak.

Tuir dadus ne’ebe Ajénsia Tatoli asesu hatudu katak iha Orsamentu Jerál Estadu (OJE) 2025 nian, Sekretária Rejionál Edukasaun no Asuntu Sosiál (SREAS) prevee, programa Ensinu Sekundáriu Jerál (ESJ) no Ensinu Tékniku Vokasionál (ETV) ho alokasaun $77,100.00 ho objetivu atu finansia konsesaun eskolár ba ESJ ho estudante na’in-2.500 komposta husi eskola hitu no ETV ho estudante na’in-1.500 husi eskola haat no seluk taan.

Notísia relevante:EBF Masin jere osan konsesaun eskolár hodi reabilita saladeaula

Jornalista: Abílio Elo Nini

Editór: Florencio Miranda Ximenes

iklan
iklan

Leave a Reply

iklan
error: Content is protected !!