DILI, 10 Marsu 2025 (TATOLI)—Diretór Nasionál Farmásia Produtu no Medikamentu (DNFPM) husi Ministériu Saúde, Delfim Ferreira, hateten lista medikamentu kategoria 10 mak sira submete ona bá Institutu Nasionál Farmásia Produtu Medikamentu (INFPM) atu sosa iha tinan ne’e.
“Lista kuantifikasaun Ministra Saúde aprova ona iha semana kotuk liubá. Agora to’o ona iha INFPM. Iha-ne’ebá lista medikamentu ne’e iha kategoria 10, entaun ekipa téknika sira hahú haree no halo filafali planu prioridade atu sosa ida-ne’ebé mak uluk no ida-ne’ebé mak sosa tuirmai. Ida-ne’e mak ekipa sira hahú ohin atu finaliza,” Delfim Ferreira dehan ba TATOLI iha INFPM, Kampung Alor, Dili, segunda ne’e.
Notísia relevante: Komisaun F hala’o fiskalizasaun ba DNFPM
Nia esplika ekipa ne’e komprimitida ona katak presiza enkontru lalais iha semana ida ka rua nia laran hotu prosesu aprovizionamentu hahú la’o.
“Se ita ko’alia kona-ba item ne’e barak loos, maibé lista kategoria 10 mak hanesan ai-moruk vitál, esensiál, nesesáriu, item laboratóriu nian, item hemodialise, konsumável, narkotika, psikotropika no ekipamentu menór sira-ne’ebé utiliza iha fasilidade saúde sira,” nia haktuir.
Delfim hatutan lista ne’e hein ba prosesu konkursu ba tinan ida-ne’e hodi responde fasilidade saúde sira iha Timor-Leste.
“Ida-ne’e hein para prosesu konkursu ba 2025 atu responde ba nesesidade tinan ida ba fasilidade saúde sira husi Hospital Nacional Guido Valadares (HNGV) to’o postu saúde sira, inklui pedidu husi klínika madre sira no mós F-FDTL no PNTL tanba ita-nia estoke sira-ne’e mak ajuda hodi halo tratamentu ba ita-nia komunidade,” nia konklui.
Jornalista: Felicidade Ximenes
Editór: Xisto Freitas da Piedade
