DILI, 09 Abríl 2025 (TATOLI) – Konsellu Ministru aprova kriasaun Cabos de Timor-Leste, Empreza Públika (CTL, E.P) no nia estatutu hodi jere kabu submarinu fibra ótika iha Cable Leading Station (CSL) Bebonuk.
Ministru Transporte no Komunikasaun, Miguel Manetelu, hateten estabelesimentu empreza foun ne’e ho objetivu atu garante jestaun ne’ebé efisiente no sustentável ba sistema foun fiu submarinu fibra ótika nian, hanaran Sistema Kabu Submarinu Súl Timor-Leste (TLSSC, sigla inglés), nomós rede fibra ótika terrestre ne’ebé pertense ba Estadu.
Nia dehan medida ne’e ho objetivu atu hametin konektividade dijitál nasionál, ho promosaun infraestrutura moderna ida ne’ebé sei fasilita asesu ba internét ho velosidade aas no impulsiona ekonomia dijitál.
“Ohin ita aprova [kriasaun] empreza CTL ida-ne’e atu jere ita-nia kabu fibra ótika tanba lakle’ur tan kompañia Alcatel Submarine Network [ASN] ne’ebé halo intalasaun ba kabu ne’e sei entrega fiu ne’e mai ita”, Miguel Manetelu, hateten iha Palásiu Governu, ohin.
Nia haktuir katak CTL, E.P sei responsavel ba operasaun, manutensaun no espansaun rede telekomunikasaun, inklui jestaun ba TLSSC, ne’ebé liga Timor-Leste ba sistema internasionál North West Cable System (NWCS) iha Austrália.
Empreza públika ne’e mós sei responsavel ba estabelesimentu pontu prezensa no rede distribuisaun iha territóriu tomak no oferese servisu internét ho velosidade aas ba populasaun tomak liuhusi operadór telekomunikasaun nasionál sira.
Notísia relevante: Governu sei estabelese ajénsia ida hodi jere kabu submarinu
Jornalista: Arminda Fonseca
Editora: Maria Auxiliadora
