DILI, 09 Abríl 2025 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA I.P), fó-sai ba públiku rezultadu teste laboratóriu ba foos ho marka ‘Furak Liu’ ne’ebé importa husi Empreza Lisun Importasaun no Esportasaun Lda, la tama ba kategoria mínima ba konsumu umanu.
“AIFAESA,I.P hakarak fó-sai ba públiku rezultadu teste laboratóriu ba foos ho marka ‘Furak Liu’ ne’ebé importa husi Empreza Lisun hanesan tuirmai ne’e. Dahuluk, Kompañia Lisun importa foos husi nasaun Pakistaun, ne’ebé bazeia ba teste husi laboratóriu BPOM-Kupang, hatudu katak la tama ba kategoria mínima ba konsumu umanu,” Inspetora Jerál AIFAESA, Odete Viegas informa ba jornalista sira liuhusi konferénsia ba imprensa iha Matadouru, Dili, kuarta ne’e.
Nia afirma, inspesaun konjunta hamutuk ho entidade relevante sira halo selajen ba foos referidu ho totál saka 29.040.
“Amostrajen hirak-ne’e foti iha armajen Kompañia Lisun iha loron-21 fulan-Fevereiru tinan 2025. Nune’e, iha loron-27 fulan-Fevereiru 2025 via terrestre ekipa téknika husi AIFAESA transporta ka lori amostrajen ba Kupang no iha loron-28 fulan-Fevereiru tinan 2025 entrega amostrajen hirak-ne’e ba Laboratóriu BPOM-Kupang hodi halo teste,” nia haktuir.
Nune’e, Laboratóriu BPOM-Kupang halo teste ba amostrajen foos ‘Furak Liu’ ne’ebé relata katak teste refere uza métodu ho parámetru organoleptika, fíziku no kímiku, tuir padraun SNI 6128:2020, katak foos hanesan produtu prinsipál ne’ebé prodús husi prosesu moagem ka dulas hare-kulit ne’ebé prodús husi ai-horis orizya sativa.
“Tuir pradaun SNI ne’ebé uza husi Laboratóriu BPOM-Kupang katak kualidade foos klasifika ba klase tolu mak hanesan tuirmai. Dahuluk, BERAS PREMIUM (foos ho kualidade di’akliu). Daruak, BERAS MEDIUM 1 (foos ho kualidade di’ak primeiru). Datoluk, BERAS MEDIUM 2 (foos ho kualidade di’ak segundu). Rezultadu husi teste ba amostrajen foos ‘Furak Liu’ husi Laboratóriu BPOM-Kupang katak foos ho marka ‘Furak Liu’ ne’ebé halo komparasaun rezultadu analiza ho referénsia tuir padraun SNI 6128:2020,” Odete esplika.
Iha fatin hanesan, Diretora Departamentu Planu Operasionál Analiza Risku no Laboratóriu, Josefina Clarinha João, hateten rezultadu bazeia ba parámetru hirak ne’ebé halo ona teste iha laboratóriu BPOM-Kupang nian, hatudu katak foos ‘Furak Liu’ entermu kadar air mínimu bá iha padraun medium 2 nian ho kualidade menór, foos iha Indonézia ninian mínimu 14% no rezultadu teste foos ‘Furak Liu’, hatudu amostra dahuluk 12,91, amostra daruak 12,46, amostra datoluk 12,46, amostra dahaat 12,43, amostra dalimak 11,87 no amostra daneen 13,66.
“Rezultadu husi teste ba amostrajen foos ‘Furak Liu’ husi Laboratóriu BPO-Kupang katak foos ho marka “Furak Liu’ ne’ebé importa husi Empreza Lisun, orijen foos husi nasaun Pakistaun hatudu katak la tama ba kategoria kualidade mínima ba konsumu umanu, ne’ebé haree husi teste parámetru organoleptika, fíziku no kímiku, tuir padraun SNI 6128:2020 no padraun Codex alimentáriu Comission Standard for Rice Cxs 198-1995 ne’ebé sai hanesan referénsia,” Josefina haktuir.
Tanba ne’e, AIFAESA rekomenda ba entidade sira inklui ba komunidade atu fó atensaun boot ba seguransa no kualidade produtu importadu no asegura konsumu ne’ebé saudável. AIFAESA sei kontinua halo monitorizasaun rigorozu no ho partisipasaun husi entidade relevante atu prevene impaktu ba saúde públika no fó protesaun ba konsumidór sira iha Timor-Leste.
Jornalista: Felicidade Ximenes
Editór: Xisto Freitas da Piedade
