DILI, 02 Maiu 2025 (TATOLI)-Mundu alfabetizasaun iha Timor-Leste halo ona istória foun ho prezensa husi TIO Publishing, editór ofisiál dahuluk ne’ebé harii husi timoroan sira, ne’ebé ohin lansa ona livru lima, haat hosi autór lokál sira no livru traduzidu ida.
Jestór Operasaun Publikasaun TIO, Joelcio Guterres, dehan prezensa publikasaun TIO ho objetivu sai hanesan plataforma publikasaun ida ne’ebé kredivel, profisionál no enkoraja dezenvolvimentu kultura lee no hakerek iha Timor-Leste.
“Ami hakarak prova katak Timor-Leste mós iha poténsia boot iha mundu alfabetizasaun no publikasaun. Espesifikamente iha ne’e ami hakarak promove literasia tetun iha komunidade nia leet”, Joelcio Guterres dehan iha eventu lansamentu ne’ebé halo iha Timor Plaza, sesta ne’e.
Nia afirma prezensa husi editór ida-ne’e hein katak bele loke espasu luan liután ba hakerek-na’in lokál sira atu serbisu no koñesidu iha nasionál no internasionál.
TIO Publishing fornese mós International Standard Book Number liuhosi kolaborasaun ho Associação Portuguese de Editores e Livreiros: APEL, ne’ebé prezente nu’udar fórum ba nasaun membru CPLP sira iha promosaun alfabetizasaun.
“Ami iha editór na’in rua, iha publikasaun ida kona-ba investigasaun ka rezumu ida siénsia nian, ami sei buka peritu sira iha área relasionadu sira hodi halo revizaun ba testu ne’ebé ami simu. Tanba esénsia hosi publikasaun maka iha ema ida hodi halo revizaun ba hakerek”, nia hatete.
Joelcio Guterres mensiona mós livru lima ne’ebé lansa kompostu husi IKIGAI – Segredu Japaun Nian Ba Moris Naruk no Haksolok, obra ida husi Hector Garcia, Francesc Miralles ne’ebé publika iha lian-inglés no traduz ona ba lian-tetun.
Livru haat seluk ne’ebé foin-sa’e timoroan sira hakerek kompostu husi Husi Mundu Virtual ho Domin husi Mario de Oliveira Pires, Laloran Moris husi Lena Mafalda, MOONO: The Adventure and The Shadow War husi Andrea Hilaria Li no Métodu Peskiza iha Área Saúde husi Marcelo Amaral Mali.
Autór ba livru MOONO: The Adventure and The Shadow War, Andrea Hilaria Li, rekoñese la’ós fásil atu sai konsistente iha hakerek, maibé ho kompromisu no motivasaun ne’ebé maka’as, ikus mai nia konsege kompleta prosesu hakerek.
“Iha dezafiu barak ne’ebé ha’u hasoru bainhira hakerek livru ida-ne’e, no ha’u fó hanoin ba belun sira seluk ne’ebé hakarak hakerek atu nunka lakon motivasaun tanba ho hakerek ita aumenta ita-nia serbisu”, nia hatete.
Lansamentu ida-ne’e mós hetan benvindu ho laran-manas husi grupu oioin, inklui akadémiku sira, artista sira, no embaixadór leitura GREATBOOKSHOP, Felix Piedade, apresia tebes autór na’in-haat ne’ebé publika ona sira-nia hakerek atu sira bele haburas kultura lee nian.
“Orgullu tebes tanba ema na’in haat ne’e públika sira nia livru iha lian-tetun no ida ne’e bele fó oportunidade seluk ba sira seluk. Ha’u hakarak fó hanoin ba ema hotu atu iha kultura lee nian tanba aumenta ita nia koñesmentu no kapasidade”, nia esplika.
Prezensa TIO Publishing hanesan pontu nabilan ida ba hakerek-na’in foinsa’e sira ne’ebé maka hetan difikuldade atu públika sira nia obra ho profisionál iha rai-laran.
Notísia relevante: Falur lansa livru ho títulu “Ilustrasaun, Rekuperasaun no Konsiensializasaun¨
Jornalista : Osória Marques
Editora : Rita Almeida
