KOVALIMA, 09 Maiu 2025 (TATOLI) – Sekretáriu Estadu Dezenvolvimentu Lokál Mateus dos Santos Tallo observa direta eskola Bázika Sentrál (EBC, sigla portugés) Suai Loro no nia nota sala-de-aula insufisiente ba alunu sira atu hala’o atividade letiva
“Ha’u observa eskola la iha eletrisidade no eskola balun atu monu ona nune’e fó perigu ba alunu sira no haree ba sala-de-aula mós la sufisente no la segura ba ita-nia alunu sira atu hala’o prosesu aprendijazen”, Mateus dos Santos Tallo, informa ba jornalista sira, hafoin observa sala-de-aula iha EBC Suai Loro, ohin.
Hafoin observasaun kondisaun eskola, nia parte toma nota sei halo koordenasaun oinsá tau iha planu tuirmai no sei halo koordenasaun implementasaun Programa Nasionál Dezenvolvimentu Suku (PNDS), tanba PNDS konstrui ona feritóriu ba Programa merenda eskolár.
Governante ne’e promete aleinde haree ba sala-de-aula eskola EBC Suai loro la sufisente presiza koordena tan ho diretór PDNS munisípiu Kovalima atu konstrui morru protesaun no valeta bainhira PNDS no PDIM bele halo intervensaun bele rezolve.
“Ha’u sei orientasaun ba Prezidente Autoridade munisípiu Kovalima buat ne’ebé mak autoridade bele responde ita bele responde ba ida-ne’ebé mak Ministériu edukasaun bele responde nune’e bele fó kondisaun dignu ba alunu sira atu hala’o prosesu aprendijazen” nia dehan.
Alunu Oktaviana Domingas Barros sentre triste tanba durante ne’e kadeira no meza la sufisente nune’e nune’e alunu sira hadau malu atu tuur kadeira no tuur sena malu atu tuir ensinu-aprendijazen.
“Ami-nia nia eskola, kadeira no meza la to’o nune’e ami tuur hamutuk de’it no balun tuur iha rai de’it tanba atu hadau tuur iha meza ho kadeira ami tenke mai eskola sedu. Se ami tarde, tuur sena malu de’it”, nia konta tuir sitausaun no realidade ne’ebé sira enfrenta lorloron.
Ho kondisaun estabelesimentu ensinu ne’ebé nia mobiliáriu sira hanesan kadeira ho meza la iha nune’e difikulta alunu atu tuir atividade simu no fahe koñesimentu ladun ho seguru, hanesan alunu sente triste tanba mai iha eskola presiza kondisaun dignu uitoan atu partisipa atividade eskolár.
Diretór BEC Suai Loro, Fernando António rekoñese EBC Suai Loro presiza aumenta sala-de-aula 12 tanba durante ne’e la sufisiente nune’e kada sala-de-aula akumula alunu 30-resin no presiza mós apoiu mobiliária
“Iha eskola ida-ne’e hasoru problema sala-de-aula no kadeira ho meza la sufisente ba alunu sira atu tuur hodi tuir prosesu aprendijazen nune’e kadeira ida alunu na’in haat mak tuur hamutuk dala ruma alunu sira baku malu tanba meza ho kadeira la sufisente”, nia informa.
Tuir dadus, alunu iha EBC Suai Loro hamutuk 700-resin ho totaá nia profesór hamutuk 32.
Jornalista:Celestina Teles
Editór: Rafael Ximenes de A. Belo
