DILI, 12 Maiu 2025 (TATOLI)-Ministériu Petróleu no Rekursu Minerál (MPRM), Francisco da Costa Monteiro, hatete orienta ona Timor Gás no Petróleu hamutuk ho Komisaun Nasionál Aprovizionamentu (CNA, sigla portugés) lori hela kompañia sira vizita projetu Tasi Mane.
Ministru dehan prosesu projetu Tasi Mane ida-ne’e la’o di’ak tebes-tebes, no agora iha ona CNA.
Ba jornalista sira hafoin partisipa semináriu loron mundiál ba jeologia ba dala X iha UNDIL, segunda ne’e, ministru informa kompañia liu 60 mak foti ona dokumentu hodi konkore ba projetu tasi mane, hanesan autoestrada.
Kompañia ne’ebé konkore maihusi Aústralia, Europa, Índia, Indonézia, Singapura, Xina, Japaun inklui nasaun seluk.
“Ita asina tiha kontratu maka mobilizasaun sira ne’e akontese, ita iha esforsu seluk ne’ebé la’o hela hanesan bairru foun iha Suai ne’ebá, ne’e para faze ida para ikus mai ita bele muda populasaun iha Aeroportu ne’e”, nia dehan.
Ekipa MPRM ho entidade seluk halo hela estudu iha Natarbora konaba rai no tasi nian kondisaun, no mós mapamentu para haree topografia.
Notísia relevante: Governu lansa ona konkursu internasionál ba Projetu Tasi-Mane
Jornalista : Osória Marques
Editora : Rita Almeida
