DILI, 09 Juñu 2025 (TATOLI) – Ministru Petróleu no Rekursu Minerál, Francisco Monteiro, informa empreza internasionál sei submete, iha Jullu, proposta tékniku no modalidade finansiamentu ba Governu, liuhusi Ministériu Petróleu no Rekursu Minerál (MPRM).
“Ita hotu akompaña hela konkursu loke ona [Projetu Tasi-Mane]. Jullu, kompañia internasionál sira ne’ebé konkorre ne’e sei hatama sira-nia proposta téknika no finansiamentu mai ita halo avaliasaun hodi hakat ba etapa tuirmai”, Francisco Monteiro hateten.
Tuir dadus provizóriu husi MPRM, empreza besik atus rua mak manifesta ona ninia interese hodi partisipa iha konkursu públiku ne’ebé administra husi ministériu, liuhusi Komisaun Nasionál Aprovizionamentu.
Tuir projesaun Governu nian, projetu autoestrada ho distánsia kilométru 76 sei fó impaktu diretu ba ekonomia lokál liuhusi kriasaun empregu entre rihun rua to’o lima no benefísiu indiretu ba inisiativa empreendedora hanesan agrikultura, pekuária, otelária, konstrusaun no seluk tan.
Tuir nia inisiativa ne’ebé Ezekutivu hakarak avansa mak empoderamentu ba foinsa’e sira atu partisipa iha projetu estratéjiku ne’e ho koordenasaun direta ho autoridade lokál sira, la halo diskriminasaun no envolve joven iha munisípiu seluk, tanba Tasi-Mane hanesan projetu nasionál.
Iha konstrusaun auto estrada seksaun dahuluk no komponente seluk husi Tasi-Mane, Governu prepara ona kuadru legál no mekanizmu própriu ba libertasaun rai ne’ebé inklui identifikasaun ba rai, uma no plantasaun, hafoin prosede ba preparasaun baze dadus, publikasaun ne’ebé permite kontestasaun no rezolusaun iha períodu determinadu no realiza kompensasaun.
Implementasaun megaprojetu autoestrada sei posibilita esforsu atu lori rekursu petrolíferu husi área offshore no onshore, hodi prosesa iha Natarbora iha futuru, liuhusi konetividade autoestrada entre Suai Supply Base ba zona indústria petrolífera Natarbora no kondisaun infraestrutura hanesan aeroportu Suai, autoestrada hanesan baze ida ba esforsu nasionál, atu alkansa dezenvolvimentu kampu Greater Sunrise.
Lembra katak, iha 07 Marsu 2025, Konsellu Ministru autoriza Ministériu Petróleu no Rekursu Minerál halo despeza relasiona ho programa kona-ba implementasaun Projetu Tasi-Mane iha Kosta Súl nasaun nian ho montante $40.500.000.
Notisía relevante: Governu lansa ona konkursu internasionál ba Projetu Tasi-Mane
Jornalista: Arminda Fonseca
Editora: Maria Auxiliadora
