DILI, 13 Juñu 2025 (TATOLI)-Vise-Ministru Administrasaun Estatál, Jacinto Rigoberto, apela ba eskola sira ne’ebé implementa programa merenda eskolár atu tau atensaun ba menu ikan bainhira fornese ba estudante sira.
“Ha’u hakarak apela ba eskola hotu-hotu, liu-liu ba fornesedór merenda eskola, kozineira sira no mós diretór eskola sira atu tau atensaun no kontrola másimu ba ikan sira ne’ebé fornese ba eskola”, Vise-MAE dehan iha Minstériu Finansa Aitarak laran, sesta ne’e.
Nia hatutan sira fó ona xamada ba fornesedór merenda eskolár no mos kozineiru sira, atu tau ida ne’e hanesan esperénsia ida hodi labele akontese tan.
“Ba oin ami sei halo koordenasaun ho parte saúde atu intensivu haree no monitoriza ba kualidade merenda eskolár, nune’e ba oin labele akontese tan ba eskola seluk”, nia informa.
Vise-Ministru hatete vizita ona labarik sira ne’ebé lanu bainhira konsumu ikan iha merenda eskolar, no labarik sira mos komesa tuir fali ona prosesu aprendizajen.
“Loos duni katak, ida-ne’e fallansu uituan iha menu, tanba menu ida lanu ne’e menu ikan, tanba fornesedór ladún tau atensaun di’ak ba ikan”, nia realsa.
Notísia relevante: Estudante na’in-16 Eskola EBF Budin evakua bá postu saúde hafoin konsumu ai-han
Jornalista : Osória Marques
Editora : Rita Almeida
