DILI, 17 Juñu 2025 (TATOLI)–Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, hateten PNTL asegura ona suspeitu na’in-rua ho inisiál ASA no RXM tanba envolve iha krime tentativu omesídiu hodi sona vítima José Almeida Correia iha Audian, Dili, domingu (15/6).
Kazu ne’e akontese bainhira vítima no suspeitu sira haksesuk malu tanba feto, ikusmai arguidu ASA no RXM lamenta hodi halo asaun sona vítima José Almeida Correia iha kabun mamar parte karuk.
Hafoin akontesimentu, polísia patrullamentu hamutuk ho komunidade área Audian nian lori kedas vítima bá hala’o tratamentu iha Hospital Nacional Guido Valadares no suspeitu rua ne’e halai lakon.
Nune’e, iha segunda (16/6) ne’e, ekipa konjunta husi Makikit, Aranha no Servisu Informasaun Polísia no J2 buka tuir kedas suspeitu nia paradeiru to’o ikus deskobre duni suspeitu ASA no RXM nia lokalizasaun hodi kaptura no ekipa konjunta entrega kedas ba parte investigasaun Komandu PNTL Munisípiu Dili hodi submete ba prosesu identifikasaun.
Ho nune’e, kazu ne’e rejistadu ona iha Komandu Polísia Nasionál Timor-Leste Munisípiu Dili ho NUC 0090/25.DNFT.
Orlando dehan, vítima oras ne’e daudaun hala’o hela testamentu saúde iha HNGV.
Jornalista: Natalino Costa
Editór: Xisto Freitas da Piedade
