DILI, 03 Jullu 2025 (TATOLI)-Ministériu Edukasaun (ME) sei halo suspensaun konaba konsensaun eskolár ba Ensinu Sekundáriu Jerál (ESJ) Rainha da Paz no Nobel da Paz, tanba problema internu ne’ebé eskola rua-ne’e hasoru.
Diretór Nasionál Ensinu Sekundáriu Jerál (DNESJ), Benjamin Fernandes, dehan suspensaun ne’e halo tanba atribuisaun responsabilidade iha relatóriu, ministériu atribui fila-fali bainhira parte sira rezolve ona liuhusi dalan legál.
“Kuandu atribui, sé mak sei responsável ba relatóriu ne’e”, dehan nia ba TATOLI, kinta ne’e.
Eskola sira ne’bé asesu fundu ne’e hamutuk 54 iha teritóriu, inklui eskola privadu neen, no hahú fulan kotuk to’o fulan-ne’e, dirijente eskola sira asesu ona transferénsia husi governu.
“Maiória eskola sekundária jerál foti ona osan konsensaun eskolár hodi halo preparasaun ba ezame periodika daruak, ne’ebé akontese iha 14 Jullu ne’e. Tanba ne’e mak biban ne’e ha’u apela ba responsável eskola atu foti osan konsensaun eskolár hodi prosesu ba atividade realizasaun ezame”, nia dehan.
Benjamin Fernandes hatete DNESJ prepara ona $507.732 ba estudante hamutuk 42.411 iha fulan-neen nian husi Janeiru to’o Juñu.
“Kada fulan transfere hamutuk $84.622 ba totál estudante 42.311. Konsensaun eskolár tinan ida-ne’e Ministra Edukasaun aprova ona, maibé ami labele halo tranferénsia ba sira-nia konta bankária tanba seidauk finaliza relatóriu tinan kotuk”, katak nia.
Notísia relevante: Osan konsensaun eskolár tama ona konta eskola
Jornalista : Osória Marques
Editora : Rita Almeida
