DILI, 22 Setembru 2025 (TATOLI) – Ministru Planeamentu no Investimentu Estratéjiku, Gastão de Sousa, afirma katak prosesu konstrusaun Momumentu Memoriál Masakre Santa Krús la’o tarde, tanba Governu sei halo fali diskusaun ba projetu ne’e.
Prosesu ne’e atraza tanba kustu atu halo monumentu ne’e, benefisiáriu sira, liuliu Komité 12 Novembru hakarak estátua Memoriál 12 Novembru ne’e tenke halo iha Portugál no labele halo husi Indonézia no Xina.
“Entaun, hothotu hatene kustu mai husi Portugál ne’e boot liu fali kontratu ne’ebé eziste, bainhira ekipa halo fiskalizasaun. Ami agora haree, hein na’in ba projetu sira lori mai KAFI, ita halo diskusaun mak deside la’o oinsá? Tanba konfrome ami rona husi ekipa Ajénsia Dezenvolvimentu Nasionál [ADN] dehan mezmu monumentu ne’e halo iha Portugál, maibé sasán ne’e nafatin husi Xina mak bá”, Gastão de Sousa informa ba Tatoli iha Aeroporto Komoro, ohin.
Tuir nia, ho razaun sira ne’e mak membru KAFI sei haree didi’ak vantajen no dezvatajen mak foin deside. “Tanba, sasán ne’e nafatin husi Xina, tanba sá la bolu de’it sira mak mai halo iha ne’e ho folin baratu duké bá halo iha Portugál, gasta osan barak. Ida-ne’e mak sai kestaun. Agora, ministériu sira ne’ebé sai membru KAFI sei halo diskusaun, tenke deside hamutuk ba solusaun nian, ne’ebé prosesu agora la’o hela”, dehan.
Lembra katak, antes ne’e, orsamentu ne’ebé aloka ba konstrusaun Memoriál Santa Krús hamutuk millaun $1,4.
Notísia relevante: Empreza Bobolait hein Governu aprova proposta ba estátua Memoriál 12 Novembru
Jornalista: Arminda Fonseca
Editora: Maria Auxiliadora
