DILI, 21 Outubru 2025 (TATOLI)—Autoridade Munisipál Baukau hakarak implementa regra kulturál hanesan tara-bandu ho objetivu konserva tasi iha área Baukau.
Prezidente Autoridade Munisipál (PAM) Baukau, Veneranda Lemos Martins esplika hanoin ne’e mosu hafoin partisipa iha konsulta públika kona-ba polítika ho planu asaun ekonomia azúl hamutuk ho autoridade munisipál no líder komunitáriu ho tema “Ha’u-nia tasi, Ha’u-nia Timor” ne’ebé aprezenta direta husi Primeiru-Ministru, Xanana Gusmão.
“Ha’u iha hanoin hamutuk ho estrutura tomak liuliu xefe suku, aleinde iha regra sira, ami mós sei haforsa liután regulamentu tradisionál sira atu kuidadu tasi iha área Baukau,” Prezidente Autoridade Munisipál Baukau informa ba TATOLI iha edifísiu Ministériu Finansa (MF), Aitarak-Laran, Tersa ne’e.
Veneranda Lemos relata jeografikamente Munisípiu Baukau iha foho no tasi nune’e hanoin haforsa sistema kulturál hanesan tara-bandu sei konserva ai-horis tantu husi foho to’o tasi tuir pontensialidade suku sira-ne’ebé eziste iha Baukau.
Veneranda argumenta nasaun dezenvolvida sira maioria hakarak konserva tasi tanba konsidera tasi nu’udár problema tranzversál iha-ne’ebé presiza envolvimentu entidade hotu husi Governu, organizasaun sira inklui komunidade.
Eis deputada ne’e solisita autoridade lokál liuliu husi Baukau atu entende no komprende kona-ba mekanizmu, enkuadramentu legál, planu asaun ligadu ho programa diversifikasaun ekonómika azúl iha Timor-Leste.
“La’ós de’it Baukau maibé kada munisípiu tenke implementa planu ne’ebé prepara ona tuir kondisaun iha munisípiu sira,” Veneranda akresenta.
Entretantu, Governu planeia atu implementa polítika ekonomia azúl iha Timor-Leste iha-ne’ebé sei implementa programa sira hanesan literásia oseanu, dezenvolve grupu profisionál, joven embaixadór, kapasita ajente Administrasaun públika, setór públiku no sosiedade sivíl, kria komunikasaun estratéjiku inklui kampaña ekonomia azúl.
Aleinde ne’e, identifika área mariña ne’ebé protejida hanesan aprova lejizlasaun, habelar área mariña protejida, klasifika no kria jestaun, halo revizaun no kria mekanizmu jestaun inklui envolve komunidade lokál no pratika tradisionál sira.
Jornalista: Natalino Belo
Editór: Xisto Freitas da Piedade
